Адлия вазирлиги 9 март куни «Ҳуқуқий таянч» жамоат бирлашмасини рўйхатдан ўтказди. Бу ҳақда ташкилот етакчиларидан бири Аъзам Фармонов «Gazeta.uz»га маълум қилган.
Унинг айтишича, нодавлат нотижорат ташкилот жамоат бирлашмаси шаклида рўйхатдан ўтказилган. Human Rights Watch харқаро ташкилотининг собиқ юрист-консултанти ва Марказий Осиё бўйича вакили Стив Свердловнинг маълум қилишича, ташкилот уч уринишда расман рўйхатдан ўтишга муваффақ бўлган ва 2003 йилдан бери Ўзбекистонда рўйхатдан ўтган инсон ҳуқуқларини ҳимоя қилувчи биринчи ташкилот бўлди.
Рўйхатга олиш тўғрисидаги гувоҳномада қайд этилганидек, ташкилотнинг асосий мақсади фуқаролик жамиятини ривожлантириш ва инсон ҳуқуқларини таъминлашни кафолатлашда кўмаклашишдир.
Халқ орасида «Жаслиқ» номи билан танилган Қорақалпоғистонда жойлашган жазони ижро этиш муассасаси собиқ маҳкуми Аъзам Фармонов 11 йиллик тутқунликдан сўнг 2017 йили озодликка чиқарилганди. Инсон ҳуқуқлари жамиятининг аъзоси ҳисобланган Фармонов 2006 йилда товламачилик каби жиноятларни содир этишда айбли топилганди.
2018 йили озодликка чиққан журналист Дилмурод Саидов ҳамда Фармонов «Адолат тикланиши» NNТ давлат рўйхатидан ўтказиш учун мурожаат қилган, аммо уларнинг сўрови 2019 мартда рад қилинган. Шунингдек, ҳуқуқшунос Аъзам Турғунов ҳам озодликка чиққандан сўнг ўз фаолиятини давом эттириш учун Адлия вазирлигига мурожаат қилган. Аммо унинг уриниши ҳозиргача натижасиз бўлмоқда.
Бундан аввал Адлия вазирлиги томонидан бош ваколатхонаси АҚШда жойлашган халқаро нодавлат нотижорат ташкилоти «Меҳрибонлик Корпуси» (Mercy Corps)нинг Ўзбекистондаги филиали давлат рўйхатидан ўтказилгани хабар қилинганди.
Изоҳ (0)