Шу кунларда Ўзбекистонда бўлиб турган Жаҳон соғлиқни сақлаш ташкилоти (ЖССТ)нинг коронавирусга тайёргарлик бўйича етакчи консультанти Уте Эндерлейн ва ташкилотнинг фавқулотда ҳолатларга тайёргарлик кўриш дастурининг масъул ходими Жетри Регми дунёда давом этаётган эпидемияга қарши олиб борилаётган чоралар ва профилактик тадбирларнинг техник экспертизасини ўтказмоқда.
ССВ матбуот хизматининг хабарига кўра, улар Ўзбекистонга кириш ҳудудларидаги санитария-карантин пунктларида назорат ва профилактик тадбирларни ташкил қилиш, даволаш муассасаларининг хавфсизлигини таъминлаш, лабораториялар салоҳиятини мустаҳкамлаш каби қатор масалалар бўйича техник тавсияларини ҳам бермоқда.
«Биз юртингизда бир ҳафта мобайнида бўлиб, коронавирус инфекциясининг четдан кириб келиши ва тарқалишининг олдини олиш, эпидемиологик назоратни кучайтириш борасидаги ишлар халқаро талаблар асосида, ЖССТ томонидан ишлаб чиқилган стандартлар ва тавсияларга мос равишда амалга оширилаётганлигига гувоҳ бўлдик. Юртингизда ушбу инфекцияга қарши барча чоралар кўрилмоқда», — деган Уте Эндерлейн.
Шунингдек, ЖССТнинг экспертлари Ўзбекистон мутахассислари билан ҳамкорликда жаҳондаги коронавирус инфекцияси бўйича эпидемиологик ҳолатни ҳисобга олган ҳолда фавқулодда вазиятларда қандай йўл тутиш бўйича ҳам ўзаро тажриба алмашмоқда.
«Ўз ўрнида айтиб ўтиш лозимки, айни пайтда мамлакатимизга юқумли касалликлар, жумладан, COVID-19 инфекцияси кириб келишининг олдини олиш мақсадида давлат чегараларида санитария-карантин пунктларида барча эҳтиёт чоралари кўрилиб, назорат кучайтирилган. Бугунги кунда ушбу пунктларда бошқа тармоқ ходимлари қаторида 250 нафардан зиёд юқори малакали санитария-эпидемиология хизмати масъуллари белгиланган стандартлар бўйича иш олиб бормоқда. Соғлиқни сақлаш вазирлиги ва Санитария-эпидемиологик осойишталиги агентлиги ҳузурида узлуксиз 24 соат давомида фаолият кўрсатувчи штаб ташкил қилинган», — дейилади вазирлик хабарида.
Шунингдек, бугунги кунгача Ўзбекистонда коронавирус инфекцияси билан боғлиқ бирорта ҳолат қайд этилмагани таъкидланиб, аҳолидан ортиқча саросимага тушмасдан шахсий гигиена қоидаларига қатъий риоя қилиш сўралган.
Сўнгги маълумотларга кўра, коронавирус инфекцияси кириб борган мамлакатлар сони 100 дан ошди. Хитойда COVID-19 коронавируси қурбонлари сони 8 март ҳолатига кўра, 3119 кишига етди.
Изоҳ (0)