MY5 телеканалининг «Марказий студия» кўрсатувида Ўзбекистонда таълим тизимида янги тартиб жорий этилиши кутилаётгани, унга кўра, маълум тўлов эвазига ўқишга формасиз келиш имкони берилиши ҳақидаги лавҳа эфирга узатилди.
Кўрсатув бошловчилари ушбу тартиб ўқувчиларга нисбатан жорий этилиши кутилаётганини, лавҳани тайёрлаган мухбир эса олий ўқув юртлари талабалари 2,23 миллион сўм эвазига бир йил ўқишга формасиз келиш ҳуқуқини қўлга киритиши ҳақида гапиради.
Халқ таълими вазирлиги ушбу маълумотга изоҳ берар экан, бундай «ташаббус»дан бехабар эканлигини маълум қилди.
«Халқ таълими вазирлиги мазкур хабарлар нотўғри эканлигини маълум қилади. Вазирликнинг бундай ‘ташаббус’дан хабари йўқ.
Эслатиб ўтамиз, Ўзбекистон Республикаси Вазирлар Маҳкамасининг 2018 йил 15 августдаги ‘Давлат умумий ўрта таълим муассасалари ўқувчиларини замонавий мактаб формаси билан таъминлаш чора-тадбирлари тўғрисида’ги 666-сонли қарори билан давлат умумий ўрта таълим муассасалари ўқувчилари учун замонавий ягона мактаб формасини жорий этиш тартиби тўғрисидаги низом тасдиқланган бўлиб, мазкур низомда ўқувчининг ташқи кўринишига бўлган талаблар келтириб ўтилган.
Барча ота-оналар ва уларнинг ўрнини босувчи шахслар ўқув йили бошида ушбу талаблар билан таништирилиб, ўқув йили давомида ўз фарзандининг низом талабларига мос равишда умумтаълим мактабларига келишини таъминлашга масъул ҳисобланади», — дейилади вазирлик баёнотида.
Изоҳ (0)