Президент Шавкат Мирзиёев 7 март куни Тошкент шаҳрида амалга оширилиши режалаштирилган инвестиция лойиҳалари муҳокамасига бағишланган йиғилиш ўтказди.
Давлат раҳбарининг матбуот хизмати тарқатган ахборотга кўра, йиғилишда Тошкент шаҳридаги ҳар бир туманда амалга оширилиши кутилаётган истиқболли лойиҳалар тақдимоти ўтказилган.
Хусусан, «Сергели индустриал парки» кичик саноат зонасида амалга ошириладиган умумий қиймати 350 миллион долларлик, Яшнобод туманидаги Технопаркда умумий қиймати 418 миллион долларлик лойиҳалар уларнинг энг муҳимларидан.Яккасарой кичик саноат зонаси ҳудудида ташкил қилинадиган Тошкент ишбилармонлик маркази, «Юнусобод сити»даги замонавий турар жой, кўнгилочар ва ишбилармонлик марказлари ҳам, қайд этишларича, «шаҳар ривожига хизмат қилади».
Президентнинг таъкидлашича, инвестиция ва экспортдан мақсад — ишчи жой, қўшимча даромад. Тошкентда бу борада жуда катта ресурслар бор, аммо, Шавкат Мирзиёевнинг алоҳида қайд этишича, «ҳозирча уларнинг ярмидан ҳам фойдаланилмаяпти».
«Шунинг учун ҳар бир туман кесимида кичик ва ўрта корхоналарни ўрганиб, ишлаб чиқариш ва экспорт имкониятларини кенгайтириш, халқимизга кафолатланган даромад манбаи яратиш керак», — деди Шавкат Мирзиёев йиғилишда.
Изоҳ (0)