SpaceX аэрокосмик компанияси асосчиси ва Tesla раҳбари Илон Маскнинг фикрича, одамлар янги коронавируснинг тарқалишига телбаларча муносабатда бўлмоқда. «Коронавирус сабаб кўтарилаётган ваҳима — аҳмоқлик», деб ёзди у Twitter’даги саҳифасида.
Вируснинг тарқалиши Tesla фаолиятига таъсир қилди. Хусусан, январь ойида Хитойдаги Tesla Гигафаcторйъда иш вақтинча тўхтатилган эди. Бу заводда аккумляторлар, шунингдек, Модель 3 ва Модель Й автомобиллари ишлаб чиқарилади.
Ушбу заводнинг қуввати йилига 250 минг дона автомобиль ишлаб чиқаришга етказилади, деб кутилмоқда. Илон Маск февраль ойидаги чиқишларидан бирида янги коронавируснинг тарқалиши Tesla’га сезиларли салбий таъсир кўрсатиши мумкинлигини таъкидлаган эди.
Шунга қарамай, компания 2020 йилги савдо ва етказиб бериш режаларини қайта кўриб чиққани йўқ. Moody’s агентлиги таҳлилчиларининг прогнозига кўра, жорий йилда автомобиль савдолари жаҳон бўйича 2,5 фоизга қисқариши мумкин.
Жумладан, Хитой Енгил автомобиллар уюшмаси маълумотларига кўра, COVID-19 коронавируси тарқалиши давом этаётган бир вақтда Хитойда февраль ойининг биринчи ярмида енгил автомобиллар савдоси 92 фоизга камайиб кетган.
Қайд этишларича, Маск коронавирус борасидаги сўнгги баёнотини АҚШда касаллик кенг тарқалаётгани ҳақида хабарлар берилаётган бир вақтда эълон қилди. Хусусан, Tesla’нинг бош қароргоҳи жойлашган Калифорнияда 5 март куни коронавирусдан биринчи бемор вафот этди.
Шундан сўнг штатда фавқулодда ҳолат тартиби жорий этилди. Калифорния қирғоқларида тўхтатилган ва карантинга олинган Grand Princess круиз лайнерида эса 21 кишида коронавирус инфекцияси аниқланган.
Сўнгги маълумотларга кўра, жаҳон бўйича коронавирус билан касалланганлар сони 104 минг кишидан ошиб кетган.
Изоҳ (0)