Коронавирус тарқалиши шароитида тиббий ниқобларга бўлган талабнинг ортгани туфайли Facebook ва Instagram олибсотарларнинг фавқулодда вазиятларда пул ишлаб олишини тўхтатиш мақсадида тиббий ниқоблар рекламасини тақиқлашга қарор қилди. «РБК»нинг хабар беришича, бу ҳақда компания сайтида маълум қилинган.
«Биз Facebook ва Instagram’да тиббий ниқобларни сотиш бўйича реклама ва эълонларни тақиқлаймиз. Уларни етказиб бериш чекланган, нархлар ошмоқда ва одамларнинг ушбу фавқулодда вазиятдан ўз мақсадлари йўлида фойдаланишига қаршимиз», — деб ёзган Facebook маҳсулотлари менежменти бўлими раҳбари Роб Латерн ўзининг Twitter’ида. Унинг таъкидлашича, бу борада яқин кунларда тегишли чоралар кўрилади.
Бу янги коронавирус тарқалиши шароитида компания томонидан жорий этилган биринчи чеклов эмас. Аввалроқ коронавирусни даволаш ёки олдини олиш ҳақидаги маълумот бўлган ҳамда ваҳиманинг ошишига сабаб бўладиган рекламаларни блоклаши, шунингдек, вирус ҳақидаги сохта хабарларни ўчириши ҳақида маълум қилган. 4 март куни Facebook Жаҳон соғлиқни сақлаш ташкилотига ҳамда Соғлиқни сақлаш вазирликларига коронавирус ҳақидаги хабарлар учун бепул реклама майдонларини тақдим этганини эълон қилганди.
Facebook’дан ташқари Instagram ҳам касаллик ҳақидаги ёлғон маълумотларга қарши курашишга, хусусан, коронавирус ҳақидаги ёлғон маълумот тарқатилувчи хештегларни ўчиришга қарор қилган. Twitter ҳам коронавирус билан боғлиқ рекламаларни тақиқлаган эди.
Изоҳ (0)