Фарғонада 20 ёшли қиз никоҳсиз туғилган фарзандидан воз кечишга уринди. Фарғона вилояти Олтиариқ тумани прокуратурасининг «Дарё»га хабар беришича, воқеа 3 март, сешанба куни, юз берган.
Фарғонада ота-онаси билан яшовчи 20 ёшли Ясмина (исми ўзгартирилган) Эшмат (исми ўзгартирилган) билан севишиб қолади. Йигит қизнинг уйига совчи юборади. Бироқ қизнинг ота-онаси тўйга розилик бермайди.
Ота-онанинг қаршилигига қарамасдан, ёшлар ўртасидаги муносабатлар давом этиб, чуқурлашиб боради. Оқибатда эса Ясмина ҳомиладор бўлиб қолади. Шу йилнинг 3 мартида эса қиз ўз хонадонида фарзандли бўлади.
Ясмина ота-онасидан қўрқиб, эрталаб чақалоғини ўз ишхонаси олдига олиб келиб, туман ИИБ навбатчилик қисмига қўнғироқ қилган.
Шундан сўнг, Ясмина чақалоғи билан туман марказий шифохонасига юборилган. Тиббий кўрик чақалоқни Ясминанинг ўзи туққанлигини аниқланган. Қиз болани уйда туққанлиги ҳақида тушунтириш хати ёзиб берган.
Мазкур ҳолат юзасидан туман прокуратураси томонидан терговга қадар текшириш олиб борилмоқда.
Изоҳ (0)