Фаластин президенти Маҳмуд Аббос коронавирус туфайли мамлакатда 30 кунлик фавқулодда ҳолат режимини эълон қилди. «РИА Новости»нинг Reuters’га таяниб хабар беришича, бу ҳақда мамлакат бош вазири Муҳаммад Штайе маълум қилган.
«Биз коронавирусга қарши туриш ва унинг тарқалишини олдини олиш учун Фаластиннинг барча ҳудудларида фавқулодда ҳолат эълон қилишга қарор қилдик», — деган президент фармонини ўқиб эшиттирган бош вазир.
Штайенинг таъкидлашича, Фаластин президенти унга ҳужжат ижроси бажарилишини назорат қилиш ваколатини топширгани учун у барча боғча, мактаб, коллежларни ёпишга ва чет эллик сайёҳлар учун бронларни бекор қилишга қарор қилган.
Фаластин Соғлиқни сақлаш вазирлиги коронавирусдан профилактика мақсадида дунёдаги энг кўп зиёрат қилинадиган муқаддас жойлардан бири бўлган Вифлеемдаги христианлар ибодатхонаси ёпилганини маълум қилган. Ҳукумат шаҳар ва унинг атрофидаги қишлоқларда барча оммавий тадбирларнинг бекор қилинишини, шунингдек, диний ва ўқув муассасаларининг ёпилишини талаб қилган. Қайд этилишича, бундай чоралар 2 ҳафтага жорий этилган.
Ўтган бир сутка ичида Хитойдан ташқарида 2,1 минг киши коронавирус юқтириб олди. ЖССТ коронавирус Хитойдан ташқари дунёнинг 85 мамлакатида тарқалганини эълон қилди.
Изоҳ (0)