Тожикистонда олий ва ўрта таълим муассасалари карантинга ёпилмайди. Бу ҳақда мамлакат соғлиқни сақлаш ва ижтимоий таъминот вазирлигининг коронавируснинг олдини олиш штаби бошлиғи Мирҳамуддин Камолзодага таяниб, «Диалог.tj» хабар берди.
4 март куни Тожикистон уламолари кенгаши Соғлиқни сақлаш вазирлиги тавсиясига кўра, имом-хатибларга масжидларда жамоат намозларини вақтинча ўтказмаслик тавсияси билан мурожаат қилган.
Шундан кейин республикадаги барча масжидлар ёпилган. Камолзоданинг таъкидлашича, Тожикистонда коронавирусга чалиниш ҳолатлари қайд этилмаган бўлса-да, ҳокимият нафақат масжидлар, балки бошқа бир қатор муассасалар фаолиятини чеклашга мажбур бўлмоқда.
Камолзода мактаб, коллеж ва олий таълим муассасаларида ўқувчи ва талабалар мунтазам кўрикдан ўтказилаётгани ва ота-оналарга маслаҳатлар бериб борилаётганини маълум қилган.
«Ҳарорати юқори ёки нафас олишида шикояти бўлган болалар шифокорларга мурожаат қилиши лозим, улар таълим муассасасига ташрифлардан озод қилинади. Вазирлик мактаб ва ОТМларга ўқувчи ва талабалар ҳароратини ўлчаш учун термометрлар харид қилиш вазифасини топширган. Барча таълим муассасаларида уларнинг ёпилишини истисно қилувчи, биноларни зарарсизлантириш каби эпидемияга қарши тадбирлар ўтказилмоқда», — дейди мутахассис.
«Республиканинг йирик шаҳарларидаги масжидларга хорижликлар ҳам келиб намоз ўқийди. Маълумки, коронавирус ҳаво-томчи йўли билан юқади. Бизда масжидларни кунига 6-7 марталаб тозалаш ва гиламларни хлорли воситалар билан зарарсизлантириш имкони йўқ», — деб таъкидлаб ўтган Камолзода ва ҳокимият томонидан бу борада бошқа мусулмон давлатлар тажрибаси ўрганилганини қўшимча қилган.
Шунингдек, Тожикистон Таълим ва фан вазирлиги Соғлиқни сақлаш вазирлиги тавсиясига кўра, Наврўз байрамига тайёргарликни тўхтатган.
6 март ҳолатига кўра, Хитойда 80 552 кишида коронавирус аниқланган. Мамлакат бўйлаб касаллик оқибатида вафот этганларнинг умумий сони 3042 кишини ташкил этмоқда. Ўзбекистон соғлиқни сақлаш вазирлиги 4 мартдан бошлаб аҳолини коронавирусдан ҳимояланиш ҳақида SMS хабарлар орқали огоҳлантира бошлади. Тожикистон ва Хитой ўртасидаги авиапарвозлар 24 январда тўхтатилган. Шунингдек, мамлакат ҳукумати коронавирус касаллигининг тарқалиш хавфи сабаб 35 та хориж давлатлар фуқароларининг ўз ҳудудига киришини тақиқланган, қўшни давлат Афғонистон билан чегара назоратини кучайтирганди.
Изоҳ (0)