«Илм, маърифат ва рақамли иқтисодиётни ривожлантириш йили»да амалга оширишга оид давлат дастурида 2020/2021-ўқув йилидан бошлаб республика олий таълим муассасалари талабаларига ўқув йили давомида тенг улушларда камида тўрт маротаба ўқиш учун тўловларни амалга ошириш имконияти тақдим этилиши белгилаб қўйилган. Дастур 2020 йил 2 март куни Ўзбекистон Республикаси Президентининг Фармони билан тасдиқланган.
Шунингдек, дастурда республикадаги олий таълим муассасаларига давлат гранти асосида ўқишга қабул қилиш бўйича давлат буюртмаси параметрлари босқичма-босқич икки бараварга оширилиши, ОТМларда асосий мутахассисликка алоқаси бўлмаган фанлар сонини икки бараварга қисқартириш ҳам белгилаб қўйилган.
Ўзбекистон Республикаси Президенти Шавкат Мирзиёев йил бошида парламентга йўллаган мурожаатида ушбу ташаббусларни илгари сурган, давлат гранти таълим квотасини икки бараварга ошириш, қизларга алоҳида грантлар ажратиш ҳамда мутахассисликка алоқаси йўқ турли ортиқча юкламаларни бекор қилишни таклиф этганди. Давлат раҳбари бу каби ортиқча ишлар таълимнинг олий таълимдаги талаба ёшлар фаолиятини 30 фоиз қисмини қамраб олганини таъкидлаган.
Фармонга мувофиқ, 2020 йилда камида 5 та олий таълим муассасасини конкурс асосида танлаб, нуфузли хорижий олий таълим даргоҳлари билан ҳамкорликда уларни трансформация қилиш чоралари кўрилади.
2020/2021-ўқув йилидан бошлаб Муҳаммад ал-Хоразмий номидаги Тошкент ахборот технологиялари университети, Тошкент давлат юридик университети ва Тошкент давлат педагогика университетида тажриба тариқасида босқичма-босқич масофавий ўқитиш шакли жорий этилади.
Шунингдек, Фармон билан Ўзбекистон Республикаси Ахборот технологиялари ва коммуникацияларини ривожлантириш вазирлигига Олий ва ўрта махсус таълим вазирлиги билан биргаликда экспертлар, шу жумладан, хорижий экспертлар иштирокида маълумотлар ҳақидаги фан, улкан маълумотлар, сунъий интеллект каби йўналишларда кадрлар тайёрлашни назарда тутган ҳолда, ахборот-коммуникация технологиялари ва рақамли иқтисодиёт соҳасидаги ўқув дастурлари қайта кўриб чиқилишини таъминлаш вазифаси юкланган.
Халқ таълими соҳасида – Халқ таълими вазирлиги Ахборот технологиялари ва коммуникацияларини ривожлантириш вазирликларига ёшлар таълими ва аёллар бандлиги бўйича «Беш ташаббус» лойиҳаси доирасида 2020 йил 1 сентябрдан бошлаб алоҳида умумтаълим муассасаларида болаларни мактаб фанларига электрон ўқитиш бўйича, шу жумладан, электрон синф журнали, ўқувчилар кундаликларини рақамлаштириш ва электрон материаллар кутубхонасини (дарсликлар, видео дарслар, виртуал лабораториялар ва бошқалар) ўз ичига олган тажриба тариқасида ахборот тизимларини қоғоз ҳужжатларни бекор қилган ҳолда жорий этиш топширилган.
Шунингдек, 2020/2021-ўқув йилидан бошлаб умумий ўрта таълим мактаблари ўқитувчиларининг юкламаси мақбуллаштириш, йил охирига қадар 6 ёшли болаларни мактабга тайёрлаш тизимини жорий этган ҳолда, мактабгача таълим билан қамраб олиш даражасининг 60 фоизга етказишни таъминлаш белгиланган.
Аввал мазкур фармонда Ўзбекистонда давлат сири деб ҳисобланган маълумотлар рўйхати 2020 йил 1 сентябргача қайта кўриб чиқилиши, пенсия тайинлаш тартиби соддалаштирилиши ҳақида хабарлар берилган.
Изоҳ (0)