“Ilm, ma’rifat va raqamli iqtisodiyotni rivojlantirish yili”da amalga oshirishga oid davlat dasturida 2020/2021-o‘quv yilidan boshlab respublika oliy ta’lim muassasalari talabalariga o‘quv yili davomida teng ulushlarda kamida to‘rt marotaba o‘qish uchun to‘lovlarni amalga oshirish imkoniyati taqdim etilishi belgilab qo‘yilgan. Dastur 2020-yil 2-mart kuni O‘zbekiston Respublikasi Prezidentining Farmoni bilan tasdiqlangan.
Shuningdek, dasturda respublikadagi oliy ta’lim muassasalariga davlat granti asosida o‘qishga qabul qilish bo‘yicha davlat buyurtmasi parametrlari bosqichma-bosqich ikki baravarga oshirilishi, OTMlarda asosiy mutaxassislikka aloqasi bo‘lmagan fanlar sonini ikki baravarga qisqartirish ham belgilab qo‘yilgan.
O‘zbekiston Respublikasi Prezidenti Shavkat Mirziyoyev yil boshida parlamentga yo‘llagan murojaatida ushbu tashabbuslarni ilgari surgan, davlat granti ta’lim kvotasini ikki baravarga oshirish, qizlarga alohida grantlar ajratish hamda mutaxassislikka aloqasi yo‘q turli ortiqcha yuklamalarni bekor qilishni taklif etgandi. Davlat rahbari bu kabi ortiqcha ishlar ta’limning oliy ta’limdagi talaba yoshlar faoliyatini 30 foiz qismini qamrab olganini ta’kidlagan.
Farmonga muvofiq, 2020-yilda kamida 5 ta oliy ta’lim muassasasini konkurs asosida tanlab, nufuzli xorijiy oliy ta’lim dargohlari bilan hamkorlikda ularni transformatsiya qilish choralari ko‘riladi.
2020/2021-o‘quv yilidan boshlab Muhammad al-Xorazmiy nomidagi Toshkent axborot texnologiyalari universiteti, Toshkent davlat yuridik universiteti va Toshkent davlat pedagogika universitetida tajriba tariqasida bosqichma-bosqich masofaviy o‘qitish shakli joriy etiladi.
Shuningdek, Farmon bilan O‘zbekiston Respublikasi Axborot texnologiyalari va kommunikatsiyalarini rivojlantirish vazirligiga Oliy va o‘rta maxsus ta’lim vazirligi bilan birgalikda ekspertlar, shu jumladan, xorijiy ekspertlar ishtirokida ma’lumotlar haqidagi fan, ulkan ma’lumotlar, sun’iy intellekt kabi yo‘nalishlarda kadrlar tayyorlashni nazarda tutgan holda, axborot-kommunikatsiya texnologiyalari va raqamli iqtisodiyot sohasidagi o‘quv dasturlari qayta ko‘rib chiqilishini ta’minlash vazifasi yuklangan.
Xalq ta’limi sohasida – Xalq ta’limi vazirligi Axborot texnologiyalari va kommunikatsiyalarini rivojlantirish vazirliklariga yoshlar ta’limi va ayollar bandligi bo‘yicha “Besh tashabbus” loyihasi doirasida 2020-yil 1-sentabrdan boshlab alohida umumta’lim muassasalarida bolalarni maktab fanlariga elektron o‘qitish bo‘yicha, shu jumladan, elektron sinf jurnali, o‘quvchilar kundaliklarini raqamlashtirish va elektron materiallar kutubxonasini (darsliklar, video darslar, virtual laboratoriyalar va boshqalar) o‘z ichiga olgan tajriba tariqasida axborot tizimlarini qog‘oz hujjatlarni bekor qilgan holda joriy etish topshirilgan.
Shuningdek, 2020/2021-o‘quv yilidan boshlab umumiy o‘rta ta’lim maktablari o‘qituvchilarining yuklamasi maqbullashtirish, yil oxiriga qadar 6 yoshli bolalarni maktabga tayyorlash tizimini joriy etgan holda, maktabgacha ta’lim bilan qamrab olish darajasining 60 foizga yetkazishni ta’minlash belgilangan.
Avval mazkur farmonda O‘zbekistonda davlat siri deb hisoblangan ma’lumotlar ro‘yxati 2020-yil 1-sentabrgacha qayta ko‘rib chiqilishi, pensiya tayinlash tartibi soddalashtirilishi haqida xabarlar berilgan.
Izoh (0)