Ўзбекистон Хитойга гуманитар ёрдамнинг иккинчи партиясини юборди, деб хабар бермоқда ФВВ матбуот хизмати. Унда энг зарурий тиббий анжомлар, хусусан, бир марта қўлланиладиган стерил қўлқоплар, ҳимояловчи уст кийим, ниқоб ва бошқалар мавжуд.
«Gazeta.uz»нинг ёзишича, гуманитар юк ортилган Мудофаа вазирлигига қарашли CАSА C-295 самолёти Тошкент аэропортидан Хитойнинг Урумчи шаҳрига 3 март куни соат 15:30 да учиб кетган.
Эслатиб ўтамиз, Президент Шавкат Мирзиёевнинг фармойишига мувофиқ Ўзбекистон коронавирус янги турининг кенг тарқалишини олдини олиш, эпидемиологик вазиятни жиловлаш ҳамда уни маҳаллийлаштириш, касалликка қарши кураш ҳаракатларни қўллаб-қувватлаш мақсадида 12 февраль куни Хитойга инсонпарварлик ёрдамини жўнатган эди.
Унда иштирок этган Ташқи ишлар вазири ўринбосари Дилшод Аҳатов «Хитой қудратли давлат, улар кўп амалий ишларга қўл урган, саъй-ҳаракатлар қилинмоқда. Бу давлатнинг қудрати ва имкониятларини инобатга олган ҳолда улар синовни енгиб ўтишига ишонамиз», — деб айтганди.
Сўнгги маълумотларга кўра, бутун дунё бўйлаб коронавирусни юқтириб олганлар сони 90 370 кишига етган. Касалликка чалинганлар сони бўйича Хитойдан кейинги ўринларда Жанубий Корея (4335), Италия (2036) ва Эрон (1501) кетмоқда. Жаҳон соғлиқни сақлаш ташкилотининг маълум қилишича, дунёнинг 64 давлатида коронавирус аниқланган.
Мавзуга доир:
- Соғлиқни сақлаш вазирлиги Ўзбекистонда коронавирус тарқалгани ҳақидаги хабарларни рад этди
- Ўзбекистонда коронавирус тарқалган 14 давлатдан келган фуқароларни карантинга олиш ҳақида қарор қабул қилинди. Карантинни бузганлар жавобгарликка тортилади
- Ўзбекистон дунёда коронавирус тарқалгани туфайли тахминан бир миллиард доллар йўқотиши мумкин
Изоҳ (0)