Туркия қуролли кучлари Алеппо вилоятидаги Сурия ҳукумат қўшинлари томонидан назорат қилинувчи ҳарбий аэродромга ҳужум уюштирди. Операция оқибатида ушбу объект фойдаланиш учун яроқсиз аҳволга келиб қолган, деб хабар беради CNN Turk.
Anadolu агентлигининг ёзишича, Туркия аэродромга учувчисиз учар қурилмалар ва турк артиллерия кучлари ёрдамида зарба бериб, уни яксон қилган.
Сурия қўшинлари аэродромдан турк ҳарбий кучлари ва Идлибдаги аҳоли пунктларига ҳужум қилишда фойдаланган.
Аввалроқ Суриянинг САНА ахборот агентлиги ҳукумат ҳарбий ҳаво кучларининг иккита самолёти Идлиб вилояти яқинида турк ҳарбийларининг ҳужумига учраганини хабар қилганди.
Идлибдаги вазият Туркиянинг Сурия ҳукумати қўшинларига қилган ҳужуми оқибатида чигаллашган. Февраль охирида Анқара Суриянинг ҳаводан ҳужуми оқибатида 33 нафар турк ҳарбийсининг ҳалок бўлганини тасдиқлаган ва ушбу ҳаракатга ҳужум билан жавоб қайтарганди.
Изоҳ (0)