Вашингтоннинг «Толибон» ҳаракати билан имзолаган тинчлик битими — АҚШ капитуляция (таслим бўлиш)ни билдиради. Бу ҳақда Эрон ташқи ишлар вазири Жавод Зариф ўзининг Twitter’даги саҳифасида маълум қилди.
«Америкалик истилочилар ҳеч қачон Афғонистонга бостириб кириши керак эмас эди. Энди, 19 йиллик хўрликдан сўнг, АҚШ таслим бўлишга қарор қилди», — деб ёзади Зариф.
Унинг сўзларига кўра, АҚШ — «бу тартибсизликни келтириб чиқараётган муаммо». Ташқи ишлар вазирининг фикрича, Афғонистондаги вазият Яман, Сурия ва Ироқда ҳам қайтарилади.
Эслатиб ўтамиз, 29 февраль куни Қатар пойтахти Доҳада АҚШнинг Афғонистон бўйича махсус вакили Залмай Халилзод ҳамда «Толибон» етакчисининг ўринбосари, ҳаракатнинг Қатардаги офиси раҳбари мулла Абдулла Ғани Бародар келишув битимини имзолаган эди. Ўзбекистон ташқи ишлар вазири Абдулазиз Комилов бошчилигидаги делегация ҳам ушбу тинчлик музокараларида иштирок этган. «Толибон» Ўзбекистоннинг Афғонистон можаросини ҳал этишдаги саъй-ҳаракатларини эътироф этган эди.
Изоҳ (0)