Коронавируснинг Ўзбекистон ҳудудига кириб келиши ва тарқалишининг олдини олиш мақсадида 1 март кунидан Афғонистон, Эрон ва Италия билан авиақатновлар вақтинчалик тўхтатилди. Бу ҳақда Ташқи ишлар вазирлиги хабар берди.
Қайд этилишича, COVID-19 коронавируснинг Ўзбекистон ҳудудига кириб келиши ва тарқалишининг олдини олиш мақсадида мамлакат Транспорт вазирлиги Афғонистон, Эрон ва Италия авиация идоралари ва компанияларини 1 март кунидан бошлаб мазкур давлатлар билан авиақатновларнинг вақтинчалик тўхтатилганлиги тўғрисида расман хабардор қилди.
Билдирилишича, Ўзбекистон томони коронавирус тарқалиши билан боғлиқ вазиятнинг барқарорлашиши билан мазкур мамлакатлар авиакомпанияларининг мавжуд слотлари қайта тикланишига кафолат берилишини тасдиқлади.
Ўзбекистон фуқароларига Афғонистон, Эрон ва Италиядаги ҳолатнинг яхшилгунига қадар ушбу мамлакатларга боришдан тийилиб туришлари тавсия этилган.
Юқоридагилардан келиб чиққан ҳолда Ташқи ишлар вазирлиги хорижда, жумладан, коронавирус билан оғриган беморлар аниқланган давлатлар ҳудудида бўлиб турган Ўзбекистон фуқароларига зарур ҳолатларда мамлакатнинг чет элдаги дипломатик ваколатхоналарига мурожаат қилишлари мумкинлигини эслатиб ўтган.
Аввалроқ, Uzbekistan Airways авиакомпанияси 1 март куни Сеулдан Тошкентга Жанубий Кореядаги Ўзбекистон фуқароларининг илк гуруҳи қабул қилгани ҳақида хабар берилганди. Миллий авиакомпания 1 мартдан бошлаб Жанубий Кореяда коронавирус авж олиши сабабли Сеулга бўлган қатновларни вақтинча тўхтатиб тургани ҳақида хабар берилганди. Шунингдек, Uzbekistan Airways Япония ва Италияда коронавирус авж олиши сабабли Uzbekistan Airways авиакомпанияси 2020 йилнинг 1 мартидан бошлаб Токио ва Римга бўлган йўналишдаги қатновларни вақтинча тўхтатгани маълум қилинганди.
Изоҳ (0)