Тожикистон ва Ўзбекистон расмий статистика маълумотларига кўра, мамлакатлар ўртасидаги савдо айланмаси 2020 йил январь ҳолати бўйича деярли икки баробарга фарқ қилмоқда. Бу резидентлар ва норезидентлар ўртасида юзага келадиган ташқи савдо операцияларини ҳисоблаш методологияси билан боғлиқ, деб хабар беради «Азия-Плюс».
Тожикистон статистика агентлигининг маълумотларига кўра, тожик—ўзбек товар айланмасининг умумий ҳажми январь ойида 22,8 миллион долларни ташкил этган. Таъкидланишича, ўтган ойда Ўзбекистонга экспорт 3,6 миллион доллардан ортиқни, импорт эса 19,2 миллион долларни ташкил этган.
Шу билан бирга, Ўзбекистон Давлат статистика қўмитаси январь ойида Тожикистон билан икки томонлама савдо ҳажми 41,3 миллион долларга етганини маълум қилган. Хусусан, Тожикистонга экспорт ҳажми 30 миллион долларни, импорт эса 11,3 миллион долларни ташкил қилди.
Тожикистон президенти ҳузуридаги статистика агентлигининг таъкидлашича, Тожикистонда, МДҲнинг бошқа давлатларида бўлгани каби ташқи савдо статистикаси ҳам МДҲ давлатлараро статистика қўмитасининг услубий тавсиялари ва Халқаро валюта жамғармасининг «Тўлов баланси ва халқаро инвестицион позиция»си тўғрисидаги олтинчи нашри услубияти асосланган.
«Тожикистонда ташқи савдо айланмаси товарлар ва халқаро хизматлар бўйича алоҳида шаклланади. Статистика агентлиги мамлакат божхона хизматининг, ‘Барки Тожик’, ‘Помиренержи’, ‘Тожиктрансгаз’ компанияларининг импорт ва экспорт борасидаги расмий маълумотларига таянади», — дейилади хабарда.
Бироқ давлатлар ўртасидаги ташқи савдо айланмасини тузишда, охирги фойдаланиш борасида бошқа давлатларга тўғри келадиган ва мамлакат учун транзит хусусиятига эга бўлган товарлар чиқариб ташланади.
Таъкидланишича, халқаро хизматларнинг экспорти ва импорти тўғрисидаги маълумотлар Тожикистонда ишлайдиган корхона ва ташкилотлар тақдим этган маълумотлар асосида тузилади. Хусусан, юк ва йўловчиларни темир йўл, автомобиль ва ҳаво транспорти орқали ташиш хизматлари, почта алоқа хизматлари, туроператорларнинг хизматлари ва бошқалар.
Изоҳ (0)