Видео: Оқдарёда масъуллар болаларни бақиртириб, ноқонуний қурилмани бузмоқда. МИБ изоҳ берди

Ижтимоий тармоқларда 28 февраль, жума куни, ноқонуний қурилган қурилмани бузиш ҳолатлари акс этган видеолавҳа тарқалди. Самарқанд вилояти МИБ бошқармаси видео юзасидан муносабат билдирди.

Бошқарманинг маълум қилишича, фуқаролик ишлари бўйича Пайариқ туманлараро судининг 2019 йилининг 24 октябрдаги ижро варақасига кўра, қарздор Феруз Файзиев томонидан Оқдарё тумани, Лойиш шаҳарчаси, Янгиобод кўчасидаги ноқонуний эгаллаб олинган 0,12 гектар ер майдонидаги ўзбошимчалик билан қурилган 16 м2 иборат бино ва 25 метр узунликдаги девор қарздорнинг ҳисобидан бузиш ва ер майдонини аввалги ҳолатига қайтариш тўғрисидаги ижро ҳужжати 2020 йилнинг 11 январида МИБ Оқдарё туман бўлими иш юритувига келиб тушган.

«Қарздор Феруз Файзиев ушбу ижро ҳужжати бўйича қурилган ноқонуний бино ва деворни ўзининг ҳисобидан бузиш ва ер майдонини аввалги ҳолатига қайтариш тўғрисида бўлим давлат ижрочилари томонидан бир неча маротаба огоҳлантирилган, бироқ шунга қарамасдан, қарздор ижро ҳужжатининг ижросини ихтиёрий равишда бажармасдан келган», — дейилади бошқарма хабарида.

26 февраль, чоршанба куни, туман ҳокимлиги, туман ИИБ, туман ер ресурслари ва давлат кадастри бўлими, туман тиббиёт бирлашмаси, туман ёнғин хавфсизлиги бўлими ходимлари иштирокида мажбурий ижро ҳаракатларини амалга ошириш давомида Феруз Файзиевнинг оила аъзолари ва яқин қариндошлари томонидан тўсқинлик кўрсатилишига қарамасдан, ноқонуний қурилган 25 метр девор ва 16 м2 дан иборат бино мажбурий тартибда қисман бузилганидан сўнг, Феруз Файзиев бинонинг бузилмай қолган қисмини ихтиёрий равишда ўз ҳисобидан бузишини маълум қилганидан сўнг, ижро ҳаракатлари якунига етказилмаган.

МИБ Самарқанд вилояти бошқармаси қайд этишича, ижро ҳаракатлари давомида ходимлар ўз ваколатлари доирасида ҳаракат қилиб, жавобгар ҳамда унинг қариндошларига бирор-бир тан жароҳатлари етказиш ёки бошқа ноқонуний ҳолатлар содир этмаган.

Қўшимча қилинишича, Феруз Файзиевнинг эгалигида икки қаватдан иборат бир нечта дорихона, 2 та озиқ-овқат ва 1 та хўжалик моллари дўкони, хусусий ошхона ҳамда тиббий клиникадан иборат нотурар жой бинолари, шунингдек, Феруз Файзиевнинг отаси номига расмийлаштирилган 0,09 гектар ер майдонидаги 262,5 м2 дан иборат турар жой биноси мавжуд.

Аввалроқ Сурхондарёнинг Олтинсой туманида 14 февраль куни маҳаллий аҳоли ва ҳокимият вакиллари ўртасида тўқнашув юз бергани ҳақида хабар берилганди.

Олтинсойдаги воқеа юзасидан Ички ишлар вазирлиги ҳамда Бош прокуратуранинг муносабатлари эълон қилинган.