Video: Oqdaryoda mas’ullar bolalarni baqirtirib, noqonuniy qurilmani buzmoqda. MIB izoh berdi

Ijtimoiy tarmoqlarda 28-fevral, juma kuni, noqonuniy qurilgan qurilmani buzish holatlari aks etgan videolavha tarqaldi. Samarqand viloyati MIB boshqarmasi video yuzasidan munosabat bildirdi.

Boshqarmaning ma’lum qilishicha, fuqarolik ishlari bo‘yicha Payariq tumanlararo sudining 2019-yilining 24-oktabrdagi ijro varaqasiga ko‘ra, qarzdor Feruz Fayziyev tomonidan Oqdaryo tumani, Loyish shaharchasi, Yangiobod ko‘chasidagi noqonuniy egallab olingan 0,12 gektar yer maydonidagi o‘zboshimchalik bilan qurilgan 16 m2 iborat bino va 25 metr uzunlikdagi devor qarzdorning hisobidan buzish va yer maydonini avvalgi holatiga qaytarish to‘g‘risidagi ijro hujjati 2020-yilning 11-yanvarida MIB Oqdaryo tuman bo‘limi ish yurituviga kelib tushgan.

“Qarzdor Feruz Fayziyev ushbu ijro hujjati bo‘yicha qurilgan noqonuniy bino va devorni o‘zining hisobidan buzish va yer maydonini avvalgi holatiga qaytarish to‘g‘risida bo‘lim davlat ijrochilari tomonidan bir necha marotaba ogohlantirilgan, biroq shunga qaramasdan, qarzdor ijro hujjatining ijrosini ixtiyoriy ravishda bajarmasdan kelgan”, — deyiladi boshqarma xabarida.

26-fevral, chorshanba kuni, tuman hokimligi, tuman IIB, tuman yer resurslari va davlat kadastri bo‘limi, tuman tibbiyot birlashmasi, tuman yong‘in xavfsizligi bo‘limi xodimlari ishtirokida majburiy ijro harakatlarini amalga oshirish davomida Feruz Fayziyevning oila a’zolari va yaqin qarindoshlari tomonidan to‘sqinlik ko‘rsatilishiga qaramasdan, noqonuniy qurilgan 25 metr devor va 16 m2 dan iborat bino majburiy tartibda qisman buzilganidan so‘ng, Feruz Fayziyev binoning buzilmay qolgan qismini ixtiyoriy ravishda o‘z hisobidan buzishini ma’lum qilganidan so‘ng, ijro harakatlari yakuniga yetkazilmagan.

MIB Samarqand viloyati boshqarmasi qayd etishicha, ijro harakatlari davomida xodimlar o‘z vakolatlari doirasida harakat qilib, javobgar hamda uning qarindoshlariga biror-bir tan jarohatlari yetkazish yoki boshqa noqonuniy holatlar sodir etmagan.

Qo‘shimcha qilinishicha, Feruz Fayziyevning egaligida ikki qavatdan iborat bir nechta dorixona, 2 ta oziq-ovqat va 1 ta xo‘jalik mollari do‘koni, xususiy oshxona hamda tibbiy klinikadan iborat noturar joy binolari, shuningdek, Feruz Fayziyevning otasi nomiga rasmiylashtirilgan 0,09 gektar yer maydonidagi 262,5 m2 dan iborat turar joy binosi mavjud.

Avvalroq Surxondaryoning Oltinsoy tumanida 14-fevral kuni mahalliy aholi va hokimiyat vakillari o‘rtasida to‘qnashuv yuz bergani haqida xabar berilgandi.

Oltinsoydagi voqea yuzasidan Ichki ishlar vazirligi hamda Bosh prokuraturaning munosabatlari e’lon qilingan.