Ўзбекистон Сенатининг 28 февраль куни бўлиб ўтган иккинчи ялпи мажлисида «Халқаро тижорат арбитражи тўғрисида»ги қонун ҳам кўриб чиқилди. «Дарё» мухбири Миролим Исажоновнинг хабар беришича, қонунда бир қатор тушунча ва тамойиллар очиб берилмагани, батафсил ёритилмагани боис ҳужжат сенаторлар томонидан рад этилган.
Таъкидланишича, минтақавий ва халқаро даражаларда қонунчилик бирхиллаштирилаётган бир шароитда ҳам миллий, ҳам халқаро даражада бозор муносабатларининг асосий элементларидан бири ҳисобланган халқаро арбитраж тижорат низоларини ҳал этишнинг муқобил, суддан ташқари шакли сифатида тобора катта аҳамият касб этмоқда.
Ўзбекистонда халқаро тижорат арбитраж судларининг фаолиятини ташкил этиш ва тугатиш тартибини ҳуқуқий тартибга солиш, хорижий инвесторлар, шунингдек, миллий компанияларни чет эллик ҳамкорлар билан ўзаро муносабатларида уларнинг ҳуқуқ ва қонуний манфаатларини ишончли ҳимоя қилишни таъминлаш ушбу қонунга зарурат туғдирмоқда.
Аммо сенаторлар қонунда қатор консептуал камчиликлар мавжудлигини билдирди. Масалан, қонуннинг 3-моддасида унинг қўлланилиш соҳаси белгиланган бўлса-да, халқаро тижорат арбитражи тушунчаси ва тамойиллари очиб берилмаган. 6-моддада қонуннинг қўлланилиш соҳасини батафсил изоҳлаш ўрнига ҳал қилиш учун халқаро тижорат арбитражига топширилиши мумкин бўлган низолар санаб ўтилган.
Сенаторларнинг фикрича, ушбу нормада халқаро тижорат арбитражи кўриб чиқиши мумкин бўлган низо предмети тўлиқ ёритилмаган. Бу ва бошқа камчиликлар туфайли қонунни жиддий такомилига етказиш зарурлиги таъкидланди ҳамда қонун сенаторлар томонидан рад этилди.
Изоҳ (0)