Бугун, 28 февраль куни, Ўзбекистон Олий Мажлиси Сенатининг иккинчи ялпи мажлиси бошлангани ҳақида хабар берилганди. «Дарё» мухбири Миролим Исажоновнинг хабар беришича, сенаторлар мажлис кун тартибидаги масалаларни кўриб чиқишга киришган.
Таъкидланишича, Сенат аъзолари янги таҳрирдаги «Ўзбекистон Республикасининг фуқаролиги тўғрисида»ги Ўзбекистон қонунини муҳокама қилишдан бошлаган.
Ўзбекистон Президенти жорий йил 24 январь куни парламентга йўллаган Мурожаатномасида инсон ҳуқуқларини таъминлаш, фуқаролик тўғрисидаги қонун ҳужжатларини такомиллаштириш борасида муҳим қадам қўйиш ва мамлакатда узоқ вақтдан бери яшаб келган, бироқ Ўзбекистон фуқароси мақомини олмаган инсонлар муаммосини қонунга мувофиқ ҳал этиш юзасидан ташкилий-ҳуқуқий чора-тадбирлар кўриш зарурлигини қайд этганди. 1995 йилгача Ўзбекистонга келган ва шундан буён истиқомат қилаётган шахсларга Ўзбекистон фуқаролигини автоматик тарзда бериш таклиф этилди. Бу 50 мингга яқин инсоннинг ҳаётидаги энг жиддий муаммо ҳисобланади.
Қонуннинг амалдаги таҳрири 28 йил аввал қабул қилинганлиги ва унинг деярли барча нормалари эскириб, замон талабларига жавоб бермай қўйганлиги таъкидланди. Қонунда фуқаролик соҳасидаги маъмурий тартиб-таомилларни янада соддалаштириш, тўғридан-тўғри амал қиладиган қонунчилик базасини яратиш, шахсларнинг Ўзбекистон фуқаролигини олиш ва бекор қилиш борасидаги ҳуқуқ ва эркинликларини таъминлашнинг ҳуқуқий механизмларини мустаҳкамлаш назарда тутилган.
Қонун билан мустаҳкамланаётган янги нормалар ҳақида сўз борганда Ўзбекистон Президенти ҳузуридаги Фуқаролик масалалари бўйича комиссиянинг мақоми, асосий вазифалари ва ваколатлари белгилаб қўйилганлиги қайд этилди. Бундан ташқари, туғилган жойи ёки ота-онасининг фуқаролиги бўйича болаларнинг Ўзбекистон фуқаролигини белгилаш тартиби мустаҳкамланди. Ўзбекистон фуқаролиги масалаларини кўриб чиқишда идоралараро электрон ҳамкорлик механизмлари назарда тутилган.
Сўзга чиққанлар қонун қабул қилиниши билан соҳага доир қонунчилик ва ҳуқуқни қўллаш амалиёти бир хилда бўлиши, инсон ҳуқуқлари ва эркинликлари ишончли ҳимоя қилиниши таъминланишига хизмат қилишини таъкидлади.
Қонун сенаторлар томонидан маъқулланди.
Изоҳ (0)