O‘zbekiston Senatining 28-fevral kuni bo‘lib o‘tgan ikkinchi yalpi majlisida “Xalqaro tijorat arbitraji to‘g‘risida”gi qonun ham ko‘rib chiqildi. “Daryo” muxbiri Mirolim Isajonovning xabar berishicha, qonunda bir qator tushuncha va tamoyillar ochib berilmagani, batafsil yoritilmagani bois hujjat senatorlar tomonidan rad etilgan.
Ta’kidlanishicha, mintaqaviy va xalqaro darajalarda qonunchilik birxillashtirilayotgan bir sharoitda ham milliy, ham xalqaro darajada bozor munosabatlarining asosiy elementlaridan biri hisoblangan xalqaro arbitraj tijorat nizolarini hal etishning muqobil, suddan tashqari shakli sifatida tobora katta ahamiyat kasb etmoqda.
O‘zbekistonda xalqaro tijorat arbitraj sudlarining faoliyatini tashkil etish va tugatish tartibini huquqiy tartibga solish, xorijiy investorlar, shuningdek, milliy kompaniyalarni chet ellik hamkorlar bilan o‘zaro munosabatlarida ularning huquq va qonuniy manfaatlarini ishonchli himoya qilishni ta’minlash ushbu qonunga zarurat tug‘dirmoqda.
Ammo senatorlar qonunda qator konseptual kamchiliklar mavjudligini bildirdi. Masalan, qonunning 3-moddasida uning qo‘llanilish sohasi belgilangan bo‘lsa-da, xalqaro tijorat arbitraji tushunchasi va tamoyillari ochib berilmagan. 6-moddada qonunning qo‘llanilish sohasini batafsil izohlash o‘rniga hal qilish uchun xalqaro tijorat arbitrajiga topshirilishi mumkin bo‘lgan nizolar sanab o‘tilgan.
Senatorlarning fikricha, ushbu normada xalqaro tijorat arbitraji ko‘rib chiqishi mumkin bo‘lgan nizo predmeti to‘liq yoritilmagan. Bu va boshqa kamchiliklar tufayli qonunni jiddiy takomiliga yetkazish zarurligi ta’kidlandi hamda qonun senatorlar tomonidan rad etildi.
Izoh (0)