Айни пайтда Олий Мажлис Сенатининг иккинчи ялпи мажлиси бўлиб ўтмоқда. Мажлисда Сенат раиси Танзила Норбоева Ўзбекистондаги камбағаллик ҳолати юзасидан ўз фикр-мулоҳазаларини билдирди.
«Ўзбекистон тарихида илк бор мамлакатдаги камбағаллик муаммоси очиқ тан олинди. Ҳозирда 4-5 миллион аҳоли камбағалликда яшамоқда. Давлат раҳбари ҳам бу масала уларни қийнашини таъкидлади. Камбағалликни камайтириш масаласи сенаторларга юклатилган энг асосий вазифа ҳисобланади. Бу масалада сенаторлар асосий ташкилотчи бўлиши керак.
Ўзбекистон мустақиллиги тарихида бундай масала кун тартибига қўйилмасди. Бу масалани очиқ-ойдин айтиш учун давлатимизда 3 йилдан бери тайёргарлик олиб борилди. Биринчи навбатда тизимли институционал база яратилди.
Камбағаллик олиб борилаётган ислоҳотларнинг энг оғир йўналиши, энг оғир масаласи десак, тўғри бўлади. Чунки бу масала биринчи навбатда одамларнинг дунёқараши билан ишлашни тақозо этади. Бизнинг халқимиз ориятли, камбағалликни бошдан кечирса ҳам бировга гапирмайдиган халқ», — деди Танзила Норбоева.
Сенат раисининг айтишича, давлат томонидан бу борада жуда катта маблағ ажратиш режалаштириляпти. Мана шу пулларни ўрнида ишлатиш, янги иш ўринлари яратиш ва йил охиригача эса камбағалликда яшаётган аҳолининг ҳаётини енгиллаштириш ва уларнинг сонини кескин қисқартириш масаласи қўйилган.
«Ўзимиз сайланган округларимизда камбағал оилалар рўйхатини тузиб, уларнинг шаънини эҳтиёт қилиб, тадбиркорликка ўқитиш ишларига кўмаклашишимиз керак бўлади», — дея Норбоева сўзларини келтирмоқда «Дарё» мухбири Миролим Исажонов.
Аввалроқ сенаторлар янги таҳрирдаги «Ўзбекистон Республикасининг фуқаролиги тўғрисида»ги қонунини маъқуллагани ҳақида хабар берилган эди.
Изоҳ (0)