Ўзбекистонда 2 мартдан савдо эквайринги учун комиссия тўловлари жорий қилинади. Барча банклар савдо ва хизмат кўрсатиш корхоналарига маҳаллий Uzcard ҳамда Humo тизимлари терминаллари орқали қилинган тўловларнинг 0,2 фоизи миқдоридаги комиссия йиғими олади. Бу ҳақда Марказий банк маълумоти асосида «Spot» хабар қилган.
«Бу мижозлар учун нархларга таъсир ўтказмайди», — дея қайд этган Марказий банкнинг тўлов тизимлари департаменти вакиллари.
Аввал Марказий банк раис ўринбосари Ботир Зоҳидов Ўзбекистоннинг 15 йил давомида нақдсиз тўловни ривожлантириш мақсадида савдо нуқталаридан комиссия тўловлари олинмаганини билдирган. Айни вақтда тўлов инфратузилмасининг таъминоти учун харажатлар банклар томонидан қопланади.
Зоҳидов савдо эквайринги учун комиссиянинг йўқлиги Visa, Mastercard каби халқаро тизимларнинг Ўзбекистонда тўлиқ ишлаб кетмаслигига сабаб бўлаётганини айтган.
«Деярли барча мамлакатларда савдо нуқтаси учун комиссия тўлови жорий қилинган. Банклараро тўлов тизимлари комиссияси улар ҳисобидан қопланади. Масалан, Россияда тўлов карталари эквайрингида ўртача 2–2,5 фоиз комиссия пули ечиб олинади. Бундан тўлов тизими ҳам, банклар ҳам ютади. Ушбу маблағнинг муайян қисми фойдаланувчиларга кешбек тарзида қайтарилади», — деган Марказий банк мутасаддиси.
Изоҳ (0)