Сеулдан келган HY514 рейси йўловчилари Тошкент аэропорти халқаро терминалининг алоҳида залида вақтинча санитария изоляциясига жойлаштирилгани ҳақида хабар берилганди. Соғлиқни сақлаш вазирлиги самолёт йўловчиларининг изоляцияси бўйича маълумот берди.
Жанубий Кореянинг Сеул шаҳридан Тошкентга учган самолёт бортида 1996 йилда туғилган, Қирғизистон фуқароси Б.Т.нинг саломатлиги ёмонлашганлиги, унда инсулт аломатлари аниқланганлиги сабабли самолёт 20:55 да Сеул аэропортига қайтарилган.
Сеул аэропортида бемор ва унинг фарзанди ҳамда бир нафар фуқаро тушириб қолдирилиб, Б.Т.дан коронавирус инфекциясига лаборатор таҳлиллар олинган.
Шундан сўнг самолёт Тошкент вақти билан соат 22:59 да Сеулдан Тошкентга 232 нафар йўловчи, 12 нафар экипаж аъзоси билан жами 244 нафар фуқаро учган ва 27 февраль куни маҳаллий вақт билан соат 05:58 да Тошкент халқаро аэропортига келиб қўнган.
Короновируснинг Ўзбекистонда тарқалишининг олдини олиш мақсадида Сеулдан келган йўловчилар Тошкент аэропорти халқаро терминалининг алоҳида залида вақтинча санитария изоляциясига жойлаштирилиб, Соғлиқни сақлаш вазирлиги томонидан бир қатор зарур профилактик тадбирлар ўтказилган.
Маълум бўлишича, Сеул шаҳрида қолган Қирғизистон фуқароси Б.Т.дан коронавирус инфекциясига олинган лаборатория таҳлил натижаларига кўра унда коронавирус аломатлари аниқланмаган.
Мавзуга доир:
Эслатиб ўтамиз, Хитой Миллий соғлиқни сақлаш комиссияси мамлакатнинг материк қисмида коронавирус инфекцияси билан касалланганлар сони 78 минг кишидан ошиб кетгани, улардан камида 29 минг нафари даволаниб, касалхонадан чиқарилганини маълум қилди.
Изоҳ (0)