Ўзбекистон Монополияга қарши курашиш қўмитасида Россиянинг «Яндекс» компанияси вакиллари билан Android’да ишловчи мобил қурилмаларга мобил иловаларни қайта ўрнатишда соғлом рақобат муҳитини яратиб беришга бағишланган учрашув бўлиб ўтди. Бу ҳақда қўмита матбуот хизмати хабар берди.
«Яндекс» вакилларнинг маълум қилишича, Android операцион тизими, Google қидирув тизими, Google Play мобил дастурлар дўкони, шунингдек, YouTube видеохостингига эгалик қилувчи Google корпорацияси «виждонсиз амалиёт» билан шуғулланади.
Россия компанияси вакилларининг таъкидлашича, ушбу амалиёт қурилма ишлаб чиқарувчиларини ҳамкор — мобил иловалар ва сервисларни ишлаб чиқувчилар танлашда ҳамда уларни Android қурилмаларига қайта ўрнатишда чеклашга қаратилган.
Йиғилиш якунига кўра, Монополияга қарши курашиш қўмитаси Ўзбекистонга импорт қилинадиган Android қурилмаларига учинчи томон дастурларини ўрнатишда рақобат шартларига риоя қилиш масаласини ўрганишга қарор қилди.
«Яндекс»нинг қайд этишича, мобил қурилмаларни ишлаб чиқарувчилар ҳам, фойдаланувчилар ҳам ўз қурилмаларига қайси қидирув тизими ва овозли ёрдамчи ўрнатилган бўлишини танлашга ҳақли.
2015 йили Россия Монополияга қарши курашиш қўмитаси «Яндекс»нинг шикоятига кўра, Google’ни рақобат тўғрисидаги қонунни бузишга айбдор деб топганди. Google 438 миллион рубл (қарийб 7 миллион АҚШ доллари) жаримага тортилган эди. Еврокомиссия Google’ни бозордаги устун мавқейини суиистеъмол қилганлиги учун камида уч маротаба жаримага тортган — 2017 йилда 2,42 миллиард евро, 2018 йилда — 5 миллиард евро, 2019 йилда — 1,5 миллиард евро.
Йиғилиш давомида «Яндекс» вакилларига рақобат тўғрисидаги қонунга рақамли платформалар ва интернет-сервислар талабларини жорий этишни назарда тутадиган бир қатор тузатишлар киритилганлигини маълум қилди. Бундан ташқари, қўмита рақамли бозорларда устунлигини суиистеъмол қилиш ҳолатларини тартибга солиш воситалари устида иш олиб бормоқда.
Аввалроқ Ўзбекистон Солиқ кодексининг янгиланган таҳририда Google учун солиқ солиниши белгилаб қўйилгани ҳақида хабар берилганди.
Изоҳ (0)