O‘zbekiston Monopoliyaga qarshi kurashish qo‘mitasida Rossiyaning “Yandeks” kompaniyasi vakillari bilan Android’da ishlovchi mobil qurilmalarga mobil ilovalarni qayta o‘rnatishda sog‘lom raqobat muhitini yaratib berishga bag‘ishlangan uchrashuv bo‘lib o‘tdi. Bu haqda qo‘mita matbuot xizmati xabar berdi.
“Yandeks” vakillarning ma’lum qilishicha, Android operatsion tizimi, Google qidiruv tizimi, Google Play mobil dasturlar do‘koni, shuningdek, YouTube videoxostingiga egalik qiluvchi Google korporatsiyasi “vijdonsiz amaliyot” bilan shug‘ullanadi.
Rossiya kompaniyasi vakillarining ta’kidlashicha, ushbu amaliyot qurilma ishlab chiqaruvchilarini hamkor — mobil ilovalar va servislarni ishlab chiquvchilar tanlashda hamda ularni Android qurilmalariga qayta o‘rnatishda cheklashga qaratilgan.
Yig‘ilish yakuniga ko‘ra, Monopoliyaga qarshi kurashish qo‘mitasi O‘zbekistonga import qilinadigan Android qurilmalariga uchinchi tomon dasturlarini o‘rnatishda raqobat shartlariga rioya qilish masalasini o‘rganishga qaror qildi.
“Yandeks”ning qayd etishicha, mobil qurilmalarni ishlab chiqaruvchilar ham, foydalanuvchilar ham o‘z qurilmalariga qaysi qidiruv tizimi va ovozli yordamchi o‘rnatilgan bo‘lishini tanlashga haqli.
2015-yili Rossiya Monopoliyaga qarshi kurashish qo‘mitasi “Yandeks”ning shikoyatiga ko‘ra, Google’ni raqobat to‘g‘risidagi qonunni buzishga aybdor deb topgandi. Google 438 million rubl (qariyb 7 million AQSh dollari) jarimaga tortilgan edi. Yevrokomissiya Google’ni bozordagi ustun mavqeyini suiiste’mol qilganligi uchun kamida uch marotaba jarimaga tortgan — 2017-yilda 2,42 milliard yevro, 2018-yilda — 5 milliard yevro, 2019-yilda — 1,5 milliard yevro.
Yig‘ilish davomida “Yandeks” vakillariga raqobat to‘g‘risidagi qonunga raqamli platformalar va internet-servislar talablarini joriy etishni nazarda tutadigan bir qator tuzatishlar kiritilganligini ma’lum qildi. Bundan tashqari, qo‘mita raqamli bozorlarda ustunligini suiiste’mol qilish holatlarini tartibga solish vositalari ustida ish olib bormoqda.
Avvalroq O‘zbekiston Soliq kodeksining yangilangan tahririda Google uchun soliq solinishi belgilab qo‘yilgani haqida xabar berilgandi.
Izoh (0)