2020 йил январь ойи якунлари бўйича Ўзбекистоннинг ташқи савдо айланмаси (ТСА) 2,9 миллиард долларни ташкил этиб, 2019 йилнинг мос даврига нисбатан 251,9 миллион долларга камайди. Бу ҳақда Давлат статистика қўмитаси томонидан тақдим этилган маълумотларда сўз боради.
ТСА’да экспорт ҳажми 1,2 миллиард долларга (ўсиш суръати – 4,9 фоиз) ва импорт ҳажми 1,6 миллиард долларга (ўсиш суръати – 8,7 фоиз) етган. Ҳисобот даврида — 373,8 миллион доллар қийматида пассив ташқи савдо баланси қайд этилган.
Ўзбекистон жаҳоннинг 129 дан ортиқ мамлакатлари билан савдо алоқаларини амалга ошириб келмоқда. ТСА’нинг нисбатан салмоқли ҳиссаси Хитойда (17,5 фоиз), Россияда (16,0 фоиз), Қозоғистонда (7,4 фоиз), Жанубий Кореяда (6,5 фоиз), Туркияда (5,7 фоиз), Афғонистон (1,7 фоиз) ва Германияда (1,6 фоиз) қайд этилган.
Ташқи иқтисодий фаолият бўйича 20 та йирик ҳамкор давлатлар орасидан олтита давлатда фаол ташқи савдо баланси кузатилган, хусусан, Афғонистон (48,3 миллион доллар), Туркия (26,9 миллион доллар) Тожикистон (18,6 миллион доллар), Қирғизистон (14,3 миллион доллар), БАА (4,3 миллион доллар) ва Эрон (2,3 миллион доллар). Қолган 14 та давлатлар билан пассив ташқи савдо баланси сақланиб қолмоқда.
2020 йил январь ойлида ташқи савдо айланмасида МДҲ давлатларининг улуши 33,7 фоизни ташкил этиб, ташқи савдо айланмасининг ўтган йилга нисбатан ўсиши 9,1 фоизни ташкил этди.
Эслатиб ўтамиз, 2018 йилда Ўзбекистоннинг ташқи савдо айланмаси 33,8 миллиард долларни ташкил этган бўлса, 2019 йил январь ноябрда 38,2 миллиард доллардан ошган эди.
Изоҳ (0)