Туркиялик мутахассис Ўзбекистон соғлиқни сақлаш вазирига маслаҳатчилик қилади. Бу ҳақда соғлиқни сақлаш вазири Алишер Шодмонов «Ўзбекистон 24» телеканалига берган интервьюсида маълум қилди.
Тайинлов тўғрисидаги келишувга Президент Шавкат Мирзиёевнинг 19—20 февраль кунлари Анқарага ташрифи чоғида эришилган.
Маслаҳатчи Ўзбекистон соғлиқни сақлаш тизимини ислоҳ қилиш ва рақамлаштириш бўйича ишлайди, молиявий менежмент, тиббий суғурта, давлат-хусусий шериклик ва аутсорсинг масалалари билан шуғулланади.
«Gazeta.uz»нинг қайд этишича, бу Ўзбекистон Соғлиқни сақлаш вазирлигида чет эл фуқароларининг юқори лавозимларга тайинланиши билан боғлиқ биринчи ҳолат эмас.
2018 йил январида жанубий кореялик профессор Юн Тэк Рим соғлиқни сақлаш вазирининг маслаҳатчиси этиб тайинланган эди. 2019 йил февралида эса унинг ҳамюрти — Ли Донг Ук вазир ўринбосари ва бош вазир ўринбосарининг ижтимоий ривожланиш бўйича маслаҳатчиси этиб тайинланган эди.
Изоҳ (0)