24 февраль, душанба куни, Ҳиндистон пойтахтида фуқаролик бўйича янги қонун туфайли содир бўлган тўқнашувларда етти киши ҳалок бўлди, 150 дан ортиқ одам жароҳатланди. Ҳодиса оқибатида ҳалок бўлганлар орасида бир нафар полициячи ҳам бор. Бу ҳақда Reuters агентлиги хабар бермоқда.
Ҳиндистон парламенти томонидан фуқаролик тўғрисидаги қонунга киритилган тузатишларга мувофиқ, Афғонистон, Покистон ва Бангладеш каби қўшни мамлакатлардан қочиб келган мусулмон бўлмаган шахслар, агар улар ўз ватанларида таҳқирлашларга учраётган бўлса, Ҳиндистон фуқаролигини соддалаштирилган тартибда олиши мумкин.
Ушбу қонун ҳиндистонлик мусулмонларнинг норозилигига сабаб бўлди — уларнинг фикрича, сўнгги тузатишлар конституцияга зид, чунки расман дунёвий ҳисобланган мамлакатда аҳолининг бир қисми диний эътиқодидан келиб чиқиб камситилмоқда. Ҳиндистон шимоли-шарқий штатлари аҳолиси ҳам қонунга эътироз билдирган — энди улар Бангладешдан келган миллионлаб одамлар уларнинг штатларида доимий қолиб кетишидан хавотирда. Бу ҳолат норозилик намойиши иштирокчиларининг фикрича, маҳаллий аҳоли манфаатларига зид.
Мухолифат вакилларининг фикрича, тузатишлар киритилган қонун камситувчи мазмунга эга, чунки мамлакат аҳолиси (1,3 миллиард киши)нинг 10 фоиздан кўпроғи ислом динига эътиқод қилаётган бир вақтда мусулмонларнинг фуқаролик олиш имкониятларини чеклайди. Танқидчиларнинг таъкидлашича, бундай шароитда диний эътиқод фуқаролик олиш учун шартга айланмаслиги лозим.
Қонунга киритилган тузатишлардан кейин унинг тарафдорлари ва қаршилар ўртасида декабрь ойидан буён тўқнашувлар содир бўлмоқда.
Нью-Делида сўнгги икки ойда кузатилган энг катта тўқнашувлардан бири 24 февраль — АҚШ президенти Дональд Трамп Ҳиндистонга ташриф буюрган кунда содир бўлди. Бир неча уй ва машиналарга ўт қўйилган.
Кундузи бошланган тўқнашувлар ярим тунгача давом этган.
Изоҳ (0)