Баҳрайн фуқаро авиацияси бошқармаси коронавирус тарқалиши шароитида Дубай халқаро аэропорти ва БААнинг Шаржа халқаро аэропортидан келадиган барча рейсларни 48 соатга тўхтатиб қўйганлигини маълум қилди. «ТАСС»нинг ёзишича, бу ҳақда BNA Bahrayn агентлиги хабар берди.
24 февраль куни Баҳрайнда коронавирус билан касалланишнинг биринчи ҳолати қайд этилгани ҳақида хабар берилган эди. Вирус Эрондан келган Баҳрайн фуқаросида аниқланган. Касал одам ва у билан алоқда бўлганларнинг барчаси шифокорлар гуруҳи назорати остида Манамадаги тиббий марказда карантинга олинган.
«Баҳрайн Фуқаро авиацияси бошқармаси айни вақтдан бошлаб Дубай халқаро аэропорти ва Шаржа халқаро аэропортидан келувчи барча рейсларнинг 48 соат давомида бекор қилинишини эълон қилди», — дейилади агентлик хабарида.
Таъкидланишича, Баҳрайн халқаро аэропортига келувчи, вирусга шубҳаланганларнинг барчаси текширилади, шунингдек касаллик белгилари аниқланган тақдирда дарҳол изоляция ва даволаш учун махсус марказларга юборилади.
Аввалроқ Афғонистонда коронавирус билан касалланишнинг илк ҳолати қайд этилгани сабабли Ҳиротда фавқулодда ҳолат эълон қилингани, Ироқда ҳам коронавирус билан касалланиш бўйича дастлабки ҳолат аниқлангани хабар берилган эди. Озарбайжонда эса 2 киши коронавирус гумони билан касалхонага ётқизилди.
Изоҳ (0)