АҚШ президенти Дональд Трамп душанба куни АҚШ разведкаси ва Демократлар партиясини ноябрь ойида бўлиб ўтадиган президентлик сайловларида Демократлар партияси номзоди Вермонт сенатори Берни Сандерсга зарар етказиш мақсадидаги фирибгарликда айблади. «ТАСС»нинг хабар беришича, бу ҳақда Трамп ўзининг Twitter’ида ёзиб қолдирган.
«Улар (разведка ходимлари) тентак Берни (Трамп Сандерсни шундай атаган — «ТАСС» шарҳи) гўё Россия менга эмас, унга ён босаётганини айтган. Буларнинг барчаси разведка жамоатчилиги ва демократлар иштирокидаги катта фирибгарликдир. Улар Сандерснинг (президентлик пойгасини) тарк этишини хоҳлайди ва Трампни ёмон кўради», — деб ёзган президент.
Унинг қўшимча қилишича, бундай фирибгарлик АҚШ махсус прокурори Роберт Мюллерн томонидан Россиянинг сайловларга аралашишга уринишлари ҳақидаги терговидан бошланган.
21 февраль куни The Washington Post газетаси АҚШ расмийлари Сандерсга Россия унга сайловолди кампаниясида ёрдам беришга уринишлари тўғрисида хабар бергани ҳақида ёзган. Газета айнан қандай ёрдам ҳақида сўз борганига аниқлик киритмаган.
Шу куни Россия президенти матбуот котиби Дмитрий Песков ҳам журналистларга берган интервьюсида АҚШнинг 2020 йил ноябрь ойида бўлиб ўтадиган президентлик сайловлари яқинлашган сари Россиянинг АҚШ сайлов жараёнига аралашишга уринишлари ҳақида тобора кўпроқ хабарлар пайдо бўлишини Кремл афсус билан кутаётганини айтган.
Аввалроқ америкаликларнинг қарийб ярмидан кўпи Трамп 2020 йилги сайловларда ғолиб бўлишига ишониши, Оқ уй Трампга қарши бўлганларнинг рўйхатини тузмоқчи эканлиги ҳақида хабар берилган эди.
Изоҳ (0)