Олтиннинг бир унсияси нархи 2,74 фоизга қимматлашди ва 1689 долларга етди. Бу 2013 йилдан буён энг юқори натижа ҳисобланади. Нарх ўсишига коронавируснинг Хитойдан ташқарида кенг тарқалаётгани сабаб бўлди, деб ёзмоқда Spot.

Фото: «Нбп.пл»

Олтин коронавирус сабабли нархи кўтарилган кам сонли маҳсулотлардан бўлди. Brent маркали нефтнинг нархи 3,5 фоизга азонлашиб, бир баррел учун 56,5 долларгача тушган. WTI маркали нефтнинг нархи эса 3,2 фоизга арзонлашиб, бир баррел учун 51,7 долларни ташкил қилган.

Мавзуга доир: Brent туридаги нефть нархи 13 ой мобайнидаги энг паст кўрсаткичга тушди

Бир қатор халқаро биржаларда котировкалар пасайиши кузатилган. Халқаро экспертларнинг коронавируснинг жаҳон иқтисодиётига таъсири билан боғлиқ хавотирлари касаллик Италия, Жанубий Корея ва Эронда кенг тарқала бошлагандан кейин кучайди. Бир сутка ичида Хитойдан ташқарида вирус билан касалланиш бўйича 400 дан ортиқ ҳолат қайд этилган.

Олтин Ўзбекистоннинг асосий экспорт маҳсулоти ҳисобланади. 2019 йилда мамлакат томонидан 4,9 миллиард долларлик олтин сотилган бўлиб, бу умумий экспорт ҳажмининг 30 фоизини ташкил қилган. Таққослаш учун, экспортда энергия ташувчилар ва нефть маҳсулотлари улуши 14,1 фоизни, енгил саноат маҳсулотлари улуши 9,1 фоизни, озиқ-овқат маҳсулотлари эса 8,5 фоизни ташкил қилган.

Хитойда коронавирус инфекциясидан бир кунда 150 киши вафот этиб, қурбонларнинг умумий сони 2592 кишига етди, деб хабар бермоқда Хитой Миллий соғлиқни сақлаш комиссияси. Хитойда яна 406 киши коронавирус юқтириб олган (шундан 348 нафари Уханда), касалланган фуқаролар сони эса 77 150 кишига етган. Касалликдан даволаниб, шифохонани тарк этганлар сони 24 734 кишини ташкил этиб, сўнгги бир суткада 1846 киши даволангани айтилмоқда. Хитойнинг Ухань шаҳрида 24 февраль ҳолатига кўра, 195 киши коронавирус билан қайта касаллангани маълум бўлди.

Мавзуга доир: Хитой коронавируси ва 24 февралнинг бошқа муҳим хабарлари