Тошкент вилоятининг Бўстонлиқ туманида жойлашган «Амирсой» тоғ-чанғи курортида қишки спорт турларининг тоғ-чанғи йўналиши бўйича Ўзбекистон чемпионати бўлиб ўтди. Бу ҳақда «Дарё» мухбири хабар берди.
Жисмоний тарбия ва спорт вазирлиги ҳамда Ўзбекистон чанғи спорти федерацияси томонидан ташкил этилган чемпионатда ўсмирлар ва ёшлар тоғ-чанғисининг слалом ва гигант слалом йўналишлари бўйича ўзаро баҳслашди.
Беш кун давом этган чемпионатда «Янгиобод», «Чимён» чанғи курорт мактаблари ўқувчилари ва республиканинг турли ҳудудларидан келган 11 ёшдан 25 ёшгача бўлган 60 нафар ҳаваскор спортчилар қатнашди. Ўзбекистон Президентининг жорий йил 4 февралда имзоланган «Қишки спорт турларини ривожлантириш чора-тадбирлари тўғрисида»ги қарори ижросини таъминлаш мақсадида ўтказилган мусобақа якунида иштирокчилар 49 та номинация бўйича тақдирланди. Улар орасида миллий терма жамоа аъзолари, Олимпиада ўйинлари иштирокчилари бор.
Тадбирда бош вазир ўринбосари, Туризм қўмитаси раиси Азиз Абдуҳакимов иштирок этди.
Изоҳ (0)