Diamond Princess круиз кемасидаги саёҳатидан сўнг карантиндан ўтиш учун олиб келинган 13 нафар АҚШ фуқаросининг 11 нафарида янги турдаги COVID-2019 коронавируси аниқланди. Бу ҳақда саёҳатчиларнинг бир қисми учун карантин ташкил этган Небраска университетининг тиббиёт маркази баёнотига асосланиб, CNN хабар бермоқда.
Қайд этишларича, беморларнинг баъзиларида касалликнинг сезилар-сезилмас белгилари бор, бошқаларида эса касаллик белгилари йўқ. Яна икки киши Небраска штатининг Омаҳа шаҳридаги шифохоналарнинг бирида карантинга олинган, уларда коронавирус аниқланмаган.
Diamond Princess круиз кемаси Япониянинг Йокогама портида 4 февралдан бери карантинда турибди. Кемада вирус тарқалаётгани 1 февраль куни Гонконгда тушиб қолган 80 ёшлик йўловчида янги турдаги вирус аниқланганидан сўнг маълум бўлган эди. Кемада жами 3,7 минг киши бўлган, уларнинг 600 нафарига коронавирус ташхиси қўйилган.
19 февраль куни кемадаги сайёҳларнинг дастлабки гуруҳига кемадан соҳилга тушишга рухсат берилди. Шу куни кемани тарк этган 500 нафар йўловчининг 300 дан ортиғи АҚШ фуқаролари эди. Лайнернинг барча соғлом йўловчиларини 21 февралга қадар эвакуация қилиш режалаштирилган эди.
Соҳилга тушган йўловчилар орасида вирусни ташувчилар борлиги ҳақида аввалроқ Австралия ҳукумати маълум қилган эди. Таҳлиллар ушбу мамлакатнинг кемада бўлиб, сўнг ватанга қайтган икки фуқаросида коронавирус борлигини кўрсатган эди.
Изоҳ (0)