Payme’нинг 2019 йил якунлари бўйича кўрган даромади миқдори 8,6 миллион грузин лариси — тахминан 3 миллион АҚШ долларига тенг бўлди. Бу ҳақда Payme’нинг 51 фоизига эгалик қилувчи Грузиянинг TBC Bank ахборотида маълум қилинган.
Компания вакилларининг қайд этишича, ўсиш 84 фоизни ташкил этган ва 2020 йил якунларига кўра ушбу кўрсаткич 12,3 миллион лари (тахминан 4,3 миллион доллар)ни ташкил этиши кутилмоқда.
EBITDA (харажатларни чиқариб ташлагунча бўлган фойда миқдори) миқдори 4,5 миллион лари (1,5 миллион доллар)ни ташкил этди. Ҳисоботда таъкидланишича, бу борада ўсиш 77 фоизни ташкил этган ва ҳозирда Payme ўз харажатларини ўзи қоплаяпти.
Payme’да рўйхатдан ўтган фойдаланувчилар сони 1,7 миллион кишидан ошиб кетган. Ушбу кўрсаткични ҳам 2020 йил якунига қадар 2,8 миллион кишига етказиш мақсад қилинган. 2019 йилда 40,1 миллион транзакция амалга оширилган бўлса, 2020 йилда ушбу миқдор 52,2 миллионга етиши прогноз қилинмоқда.
Изоҳ (0)