АҚШнинг Юта штати Сенати кўпхотинликни жиноят эмас, балки қонунбузарлик сифатида қайд этилишига розилик берди. Сенаторлар бир овоздан маъқуллаган қонун лойиҳасида кўпхотинлик учун 750 доллар жарима ва жамоатчилик ишларига жалб этиш жазоси тайинланади, деб ёзмоқда Reuters. Штатнинг амалдаги қонунчилигига кўра, кўпхотинлик жинояти учун беш йилгача қамоқ жазоси тайинланади.
Қонун лойиҳаси ҳаммуаллифи, сенатор Дейдре Хендерсоннинг айтишича, бунда гап ушбу вазиятни тўлиқ қонунийлаштириш ҳақида кетмаяпти. «Фирибгарларча кўпхотинлик» яъни бир нечта одам билан уларни огоҳлантирмасдан никоҳдан ўтиш ёки вояга етмаганлар билан турмуш қуриш жиноят бўлиб қолаверади. Бир неч йил аввал Юта бош прокурори кўпхотинлик учун судда иштирок этишни рад қилишини оммавий равишда маълум қилган, бироқ қонун бўйича кўпхотинлик жиноят деб баҳоланишда давом этаётганди.
Юта штатида тахминан 30 минг нафар фуқаро полигамия (кўпхотинлик, кўперлик) шароитида ҳаёт кечиради, дея ёзган USA Today. Уларнинг аксар қисмини христианлик динига эътиқод қилувчи мормонлар ташкил этади. Мормонлар жамияти Ютада 1847 йилда ташкил қилинган. 1890 йилда улар кўпхотинликдан воз кечган ва Юта губернатор ва cонгресс вакилларини сайлайдиган штатга айланганди (унгача ҳудудга бундай ҳуқуқлар берилмаган). Шундан бери мормонлар черкови кўпхотинликни қоралаб келади. Қароргоҳи штат маркази ҳисобланувчи Солт-Лейк-Сити шаҳрида жойлашган ташкилот етакчилари ушбу иллатдан узоқроқ бўлишга уриниб келади.
Аммо ХХ аср бошларида полигамиядан узоқлашганлар Фундоментал черковга асос солди. Кўпхотинлик рад қилингач «Бирлашган апостол биродарлари» оқими улардан ажралиб чиқди. Штат ҳудудида мормонлар эътиқодига зид равишда полигамияни инкор этмайдиган гуруҳ пайдо бўлди.
Сенатор Хендерсон Reuters нашрига берган интервьюсида, кўпхотинлик учун жазолаш амалиёти ҳеч қачон тўхтамаган ва бу фуқароларни қўрқитади. Унинг рақиблари амалдаги қонунни ўзгартирмаслик зарурлиги, кўпхотинлик аёллар ва болалар учун хавф туғдириши, шунингдек бу қизларни ўзидан анча ёши катта одамга турмушга чиқишга мажбурлаш ҳолатларини келтириб чиқаради.
«Ушбу ташаббус билан катталарга келишув асосида ўзлари истаган ишни қилиш ҳуқуқини беришмоқчи. Аслида эътиқод ва фарзандлар тарбияси қандай кечиши борасида бош қотириш лозим», — дейилади полигамияга қарши курашувчи Sound Choices Coalition ташкилотининг баёнотида.
Кўпхотинлик учун курашаётган гуруҳлар ҳам қонун лойиҳасига ўз норозилигини билдирган, уларнинг фикрига кўра ҳолатни жиноят эмас деб топилиши, вазиятни енгиллаштирмайди. Fox13 нашри полигамия тарафдорлари бўлган гуруҳнинг қонун лойиҳасига кескин қарши чиққани ҳақида ёзган. Гуруҳ фикрича, кўпхотинли одамлар барибир ўзларини жамиятнинг иккинчи навли одамлари деб ҳисоблашда давом этади. Солт-Лейк-Сити жамияти кўпхотинлик қонуний қилиниши керак деб ҳисобламоқда.
Юта штати сенати маъқуллаган лойиҳа энди штат вакиллар палатаси томонида қабул қилиниши керак ва шунда қонунга айланади. Reuters хабари бўйича, палата лойиҳани кўриб чиқиш жараёнида сенатдан кўра кескинроқ баҳслар олиб бормоқда.
Изоҳ (0)