«Халқ банки» бошқаруви раиси ўринбосари Бўка туманига ҳоким бўлди

Бўка тумани ҳокимлигида халқ депутатлари туман Кенгашининг навбатдан ташқари 3-сессияси ўтказилиб, унда ташкилий масала кўриб чиқилди.

Тошкент вилояти ҳокимлиги матбуот хизмати хабарига кўра, сессияда Низомиддин Аббосов Бўка тумани ҳокими вазифасини бажарувчи этиб тасдиқланди.

Низомиддин Аббосов 1977 йилда Самарқанд вилояти Ургут туманида туғилган. 2000 йилда Тошкент молия институтини, 2010 йилда Ўзбекистон Президенти ҳузуридаги Давлат ва жамият қурилиши академиясини тамомлаган. Меҳнат фаолияти давомида банк ва бошқарув тизимида бир қатор вазифаларда фаолият юритган.

У ушбу лавозимга тайинлангунига қадар «Халқ банки»да бошқаруви раиси ўринбосари сифатида ишлаб келган.

Эслатиб ўтамиз, 2019 йил февралидан буён Бўка тумани ҳокими лавозимида Бектемир Ибрагимов ишлаб келаётганди.

Аввалроқ Марказий банкнинг Бухоро бошқармаси бошлиғи Шофирконга ҳоким бўлгани ҳақида хабар берилган эди.