Видеода 16 февраль куни соат тахминан 14:00 да Хоразм вилояти Шовот тумани марказий деҳқон бозорида «Халқ банки» томонидан сотувга чиқарилган лотереяни ўйнаган фуқаро лотереяни сотиб олгани воқеаси акс эттирган.
Фуқаро лотереянинг махсус жойини ўчирган ва лотерея ютуғига Spark автомобили чиққан. Аммо «Халқ банки» ходими эканлиги айтилаётган лотерея сотувчиси ютуқли лотереяни фуқаронинг қўлидан юлиб олган ва унга 1000 АҚШ доллари таклиф қилган. Фуқаро рози бўлмай лотереяни беришини талаб қилган. Сотувчи эса у ердан қочишга уринган, аммо бошқа фуқаролар унинг кетишига йўл қўймай, милиция ходимларига хабар қилган.
«Халқ банки» ушбу ҳолатга расмий муносабат билдирди.
Аниқланишича, фуқаролар Қ.К. ва Р.Р. биргаликда Шовот Марказий деҳқон бозорида «Халқ банки» лотереяларини сотиш билан шуғулланиб келган. Улар «Халқ банки» ходимлари эмас. Шунингдек, бу фуқароларнинг лотереяларни сотиш бўйича «Халқ банки» билан ҳеч қандай шартномаси ҳам йўқ. Ушбу фуқаролар «Халқ банки» кассаларидан «Омад қуши» лотереяларининг ҳар бирини 3 минг сўмдан сотиб олиб, фуқароларга 4 минг сўмдан сотганлиги аниқланди.
«Халқ банки» томонидан чиқарилаётган лотереялар, хусусан, «Омад қуши» лотереяси билетига ҳам нархи алоҳида кўрсатиб ўтилган.
Хоразм вилояти ИИББниг хабар беришича, айни пайтда фуқаро И.И.нинг аризасига биноан мазкур ҳолат юзасидан ички ишлар органи ходимлари томонидан терговга қадар ўрганиш ишлари олиб борилмоқда.
Изоҳ (0)