Хитойнинг Гонконг шаҳрида коронавирус туфайли бирламчи эҳтиёж маҳсулотларининг етишмаслигидан ваҳимага тушган қуролланган босқинчилар 600 ўрам ҳожатхона қоғозини ўғирлаб кетди. Бу ҳақда South China Morning Post газетасига таяниб, «ТАСС» хабар бермоқда.
Қайд этилишича, коронавирус туфайли асосий маҳсулотлар етишмай қолишидан хавотирга тушган гонконгликлар гўшт, гуруч, лағмон, ҳожатхона қоғози, совун ва шу каби бошқа маҳсулотларни улгуржи сотиб ола бошлашган.
Газетанинг ёзишича, душанба куни соат 6:00 ларда ниқобланган уч киши Гонконгдаги дўконлардан бирининг олдида маҳсулот етказиб берувчидан тахминан 50 қадоқ ҳожатхона қоғозини ўғирлаб кетган. Полициянинг сўзларига кўра, жиноятчилардан бирининг қўлида пичоқ бўлган. Воқеа сабабли кўрилган моддий зарар миқдори қарийб 130 долларни ташкил этган.
Якшанба куни Гонконг Истеъмолчилар кенгаши бош директори нам иқлим шароитида моғорлаб кетиши мумкинлиги сабабли маҳаллий аҳолига ҳожатхона қоғозини жуда кўп сотиб олмасликни ва уйида жуда кўп миқдорда сақламасликни тавсия этган. Унинг сўзларига кўра, маҳсулот етказиб берувчилар ҳожатхона қоғози танқислиги бўлмаслигини айтган.
Аввалроқ Хитойда коронавирус эпидемияси чекинаётгани, Хубэй провинциясида коронавирус сабаб ўлаётганлар сони камая бошлагани маълум қилинган эди. Шунингдек, Хитойда коронавирусга қарши курашда «ҳал қилувчи палла» келгани, коронавирус билан касалланган, бироқ хасталигини қасддан яширган ёки сафарлари тарихини ошкор қилмаган фуқароларга нисбатан жиноий жавобгарлик жорий этилиши мумкинлиги хабар берилган.
Хитойдаги йирик фармацевтика компанияларидан бири Zhejiang Hisun Pharmaceutical ҳукуматдан COVID-19 коронавирусига қарши «Favipiravir» потенциал дори воситасини сотишни бошлаш бўйича рухсат олди.
Сўнгги маълумотларга кўра, Хитойда коронавирус билан касалланганларнинг умумий сони 70 548 кишини ташкил қилмоқда.
Изоҳ (0)