Хитойдаги вазият. Хитой Миллий соғлиқни сақлаш комиссияси маълумотларига кўра, сўнгги бир сутка ичида мамлакатда коронавирус қурбонлари сони 142 кишига кўпайиб, яна 1323 киши касалликни юқтириб олган. 16 февраль ҳолатига кўра, Хитойда 68 500 ҳолатда коронавирус билан хасталаниш қайд этилган, жаҳон бўйича эса 69 мингдан ортиқ инсон вирус билан инфекцияланган. Хитойда коронавирус қурбонларининг умумий сони 1665 кишига етган, 9 419 киши эса касалликни енгиб ўтиб, тузалишга муваффақ бўлган.
Хитойдан ташқарида касалланганлар сони бўйича энг юқори кўрсаткич Японияда — 16 февраль ҳолатига кўра, у ерда 338 киши коронавирусни юқтириб олган.
Шунингдек, Сингапурда 72 киши, Гонконгда 56 киши, Таиландда 33 киши, Жанубий Кореяда 28 киши айнан шу ташхис билан касалхонага ётқизилган. 15 февраль, шанба куни эса коронавирусдан вафот этиш билан боғлиқ Европадаги илк ҳолат қайд этилган. Францияда эса 80 ёшли хитойлик сайёҳ оламдан ўтган. Қария Францияга коронавируснинг ўчоғи ҳисобланган Хубэй провинциясидан келган.
Хитойдаги йирик фармацевтика компанияларидан бири Zhejiang Hisun Pharmaceutical ҳукуматдан COVID-19 коронавирусига қарши «Favipiravir» потенциал дори воситасини сотишни бошлаш бўйича рухсат олди. Дори сотувга чиққач, компания уни клиник синовдан ўтказишни давом эттириши керак бўлади. Аввалроқ Жаҳон соғлиқни сақлаш ташкилоти бош ижрочи директори Сумия Сваминатан COVID-19 коронавирусига қарши вакциналарни инсонда синовдан ўтказиш тўрт-беш ойдан сўнг бошланишини маълум қилганди. Хитойнинг АҚШдаги элчиси эса коронавируснинг ҳарбий ихтироларга боғлиқлигини рад этган эди.
Коронавирусдан энг кўп талафот кўрган Хубэй провинцияси ҳукумати шаҳар ва қишлоқларда яшовчи фуқароларнинг ҳаракатланиши учун транспорт хизматларидан фойдаланишни чеклаб қўйиш ҳақида қарор чиқарди. Ушбу чора-тадбирлар ҳудудда инфекция тарқалишининг олдини олиш мақсадида амалга оширилгани айтилмоқда. Шунингдек, Ухань аҳолисига коронавирус сабаб ўз микрораёнларини тарк этиш тақиқлаб қўйилди.
Хитой раҳбари Си Цзиньпин Ухань шаҳрида тарқалган зотилжам касаллиги бўйича профилактика чораларини кўриш бўйича кўрсатмани январь ойи бошидаёқ берган. У 22 январда касаллик ўчоғи ҳисобланган Хубэй провинциясига одамларнинг ҳудуддан чиқишини «тўлиқ ва қатъий назорат қилиш» тўғрисида фармойиш йўллаганини маълум қилди.
Хитойда коронавирус билан касалланган, бироқ хасталигини қасддан яширган ёки сафарлари тарихини ошкор қилмаган фуқароларга нисбатан жиноий жавобгарлик жорий этилиши мумкин. Инфекциянинг тарқалишига йўл қўйган шахс жамоат хавфсизлигига таҳдидни келтириб чиқаришда айбланиши мумкин.
Хитойда Миллий соғлиқни сақлаш комиссияси расмий вакили Лянь Ваннянь мамлакат коронавирусга қарши курашда «ҳал қилувчи палла» келганини маълум қилди. Унинг айтишича, Хитойдаги деярли барча провинцияларда коронавирусни юқтириш ҳолатлари қаторасига ўн кундан бери пасаймоқда. Бироқ Хубэй провинцияси бундан истисно бўлиб турибди. Касаллик ўчоғи бўлган мазкур ҳудуднинг айрим жойларида касалланганлар сони тез суръатлар билан кўпайиб бормоқда.
Гонконгда коронавирус туфайли бирламчи эҳтиёж маҳсулотларининг етишмаслигидан ваҳимага тушган қуролланган босқинчилар 600 ўрам ҳожатхона қоғозини ўғирлаб кетди.
Ўзбекистондаги вазият. Туркия соғлиқни сақлаш вазири Фахриддин Кўжа Ўзбекистон Туркиядан коронавирусни икки соат давомида аниқлаш имконини берувчи тиббий анжомларни харид қилишини маълум қилди. Вазирга кўра, Жаҳон соғлиқни сақлаш ташкилоти тавсияларига асосан ишлаб чиқилган мазкур тиббий анжомлар коронавирусни 99,6 фоизгача аниқлик билан топади. Ўзбекистон ва Қирғизистон бундай комплектлардан 10 мингтадан буюртма қилгани билдирилмоқда, бироқ уларнинг нархи айтилмаган.
АҚШ давлат котиби Майкл Помпео Ўзбекистон ва Қозоғистон инфратузилмалари коронавирусга қарши туриш учун тайёр эмаслигига эътибор қаратди. «Биз вирусдан ҳимояланиш учун керакли инфратузилмага эга бўлмаган ҳудудлар мавжудлигидан хавотирдамиз. Коронавирус каби кенг кўламли хавфга қарши тура олиш имкониятига эга бўлмаган, Хитой билан узоқ чегарадош Қозоғистон ва Ўзбекистонда бўлдим», — дейди Помпео.
Қашқадарё вилояти соғлиқни сақлаш бошқармасида «Юқумли касалликлар профилактикаси» мавзусида ўтказилган матбуот анжуманида вилоятда 189 нафар фуқаро коронавирусга қарши тиббий кузатувга олингани маълум қилинди.
Жаҳондаги вазият. Toyota Motor компанияси 17 февраль, душанба кунидан Хитойдаги коронавирус тарқалгани сабабли тўхтатилган заводлари ишини тиклади. Петербург суди коронавирус бўйича карантиндан қочиб кетган аёлни касалхонага мажбуран ётқизишга рухсат берди.Номаълум ва эндиликда маълум коронавирус тарқалиши билан унга алоқадор хабарлар ва янгиликлар ОАВни «портлатди». Фақат Ўзбекистонда эмас, бутун дунёда касаллик ва унинг оқибатлари ҳақида эшитмаган, ундан ҳайиқмаган одам бўлмаса керак. Кўршапалак шўрва, коронавируснинг 25 минг қурбони, отиб ташланаётган касаллар. Коронавирус ҳақида яна қандай фейк хабарлар тарқатилди? Батафсил
Изоҳ (0)