БААнинг Дубай шаҳри 16—17 февраль кунлари Бутунжаҳон аёллар форумига мезбонлик қилади. Форумнинг дастлабки кунида Ўзбекистонда гендер тенглигини таъминлаш комиссияси аъзоси Саида Мирзиёева нутқ сўзлади, дея хабар бермоқда Миллий масс-медиани қўллаб-қувватлаш ва ривожлантириш жамоат фонди.
Мирзиёева хоним ўз нутқи аввалида «келажак ҳақида фикр юритувчилар ва инноваторларга аёллар, ёш авлоднинг келажаги, замонавий дунёда улар дуч келаётган қийинчиликларни муҳокама қилиш ҳамда келажакни лойиҳалаш учун БААдан яхшироқ жой йўқ»лигини таъкидлаган. У БААнинг «тараққиётга қанчалик тез эришиш мумкинлигини кўрсатувчи намуна» эканини таъкидлаб, мамлакатнинг истисноларсиз бутун жамият учун хавфсиз ҳудудга айлана олганини эътироф этган.
«Биз бугун бу ерда эканимизнинг боиси — тажриба алмашиш, бир-биримизни қўллаб-қувватлаш ва руҳлантириш, қолаверса, жамиятларимиздаги аёлларнинг ролини ошириб, уларга инсоният цивилизациясига ўз ҳиссаларини қўшиш имконини яратиб беришдир. Аминманки, ўзбек аёлларининг ҳам дунёга айтар сўзи бор — улар инсониятнинг иқтисодий ва маданий тараққиётига салмоқли ҳисса қўша олишади», — деб айтган Саида Мирзиёева.
У Ўзбекистон тарихининг оғир синовли йилларини ёдга олиб, аёллар ўшанда ҳам жамият ҳаётида кечган воқеликларнинг ажралмас қисми бўлганини таъкидлаган. «Ўзбекистоннинг узоқ тарихи — аёлларимизнинг ҳам ўтмишидир. Шоирлар, давлат расмийлари, дипломатлар, муҳандислар, ҳамширалар, рафиқа ва оналар. Бу нозик шарқона санъат бўладими, ёки қатъий ва аниқ фанларми — ўзбек аёллари барча соҳаларда аъло даражада илгарилаб боришди, аммо сояда қолиб келишди. Уларга бошларини баланд кўтариб, ўз қобилиятлари ва маҳоратларини қўрқмай, чекловларсиз кўрсата олиш имконини берадиган вақт келди», — деди Мирзиёева.
Саида Мирзиёева Ўзбекистон аёллар ва имконияти чекланган шахсларнинг ҳуқуқлари юзасидан БМТ, ЕХҲТ, Жаҳон Банки, Ислом тараққиёт банки каби халқаро тузилмалар билан ҳамкорликда иш олиб бораётгани, мамлакатда гендер тенглигига катта эътибор қаратилаётгани ҳақида ҳам гапирган.
«Бувим Иккинчи жаҳон уруши йилларида турмуш ўртоғини ҳам руҳан, ҳам молиявий жиҳатдан қандай қўллаб-қувватлаганликлари ҳақидаги хотираларини яхши эслайман. Онамнинг отам ва биз фарзандларига чексиз мадад ва меҳр-муҳаббатини аямагани ҳам доим ёдимда туради», — деб айтган Саида Мирзиёева.
Айни вақтда у Ўзбекистон тараққиётида катта ютуқлар қўлга киритилаётгани, шу билан бирга жамият янги таҳдидлар билан тўқнаш келаётганига ҳам эътибор қаратган.
«Бу жараёнларнинг барчасида аёллар энг олдинги қаторларда турибди — қишлоқ жойларда ресурслар етишмовчилигидан азият чекяпти. Шаҳарларда эса оиладаги аёллик мажбуриятларини касби билан бирга бажаришда қийинчиликка учраяпти. Давр тақозоси билан биз ҳам яхши она, ҳам яхши мутахассис бўлишимиз, жамиятимнинг олд қаторларида юриш билан бирга оиладаги молиявий барқарорлик ҳақида қайғуришимиз лозим», — деди у.
Саида Мирзиёева Ўзбекистон ривожига катта ҳисса қўшган эски авлод вакиллари бўлмиш аёллар мамлакатдаги ҳозиргидек гендер тенглигини тасаввур ҳам қилишмаганини қўшимча қилиб ўтди. «Бугунгидек имкониятларга эгалигимиз учун оналаримиз ва бувиларимиз олдида қарздормиз. Улар эришган натижаларни сақлаб қолиш баробарида кейинги авлод қизлари учун янги марраларга етишимиз, стереотипларни енгиб ўтиб, бу ўзгаришларни кундалик ҳаётнинг бир қисмига айлантириш масъулияти елкамизда турибди», — дея қайд этган Мирзиёева.
Унинг фикрича, бу йўлдаги энг қийин масала — аёлларнинг ўзларини улар энг яхшисига муносиб эканини ишонтира олишдир. «Аёлларимиз жаҳон тараққиётига ҳисса қўша олади. Вазифамиз — шунга замин яратиб бериш. Энг мушкул вазифа — аёлларимизнинг ўзларини улар энг яхшисига муносиб эканликларига ишонтиришдир. Олдимизда қийин йўл турибди, аммо бу шунга арзийди. Аёлларимизга куч бағишлаш орқали биз миллатимизга куч берамиз, инсониятни мустаҳкамлаймиз!» — дея ўз нутқини якунлаган Мирзиёева хоним.
Эслатиб ўтамиз, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раисининг ўринбосари Саида Мирзиёева Дубай амирлиги шайхи Манал бинт Муҳаммад бин Рашид ал-Мактум зоти олиялари таклифига биноан Дубайда бўлиб турибди.
Изоҳ (0)