Жиззахда бош шифокор ходимларига ёзилган 85 млн сўм «премия» пулларини ишлатиб юборгани аниқланди

Жиззах вилояти Мирзачўл тумани Санитария эпидемиология осойишталик маркази бошлиғи ходимларига ажратилган рағбатлантириш маблағларини ўз манфаатлари йўлида ишлатиб юборгани маълум бўлди, деб хабар беради вилоят ИИБ ахборот хизмати.

Мирзачўл тумани «Мирзадала» маҳалла фуқаролар йиғинида истиқомат қилувчи 1986 йилда туғилган фуқаро Қ.У. вилоят ички ишлар бошқармасига мурожаат қилиб, ўзига тегишли бўлган рағбатлантириш пулларини Мирзачўл тумани Санитария эпидемиология осойишталик маркази бошлиғи ўзининг пластик картасига Click орқали ўтказиб, шахсий манфаатлари йўлида ишлатиб юборганини билдирган.

Вилоят ИИБ Жиноят қидирув бошқармаси, Коррупция ва иқтисодий жиноятларга қарши курашиш бўлими ходимлари томонидан олиб борилган суриштирув ишлари натижасида Мирзачўл тумани СЭОМ бош шифокори З.А. жами 85 533 896 сўм пулларни ходимларга рағбатлантириш сифатида ёзиб, шахсий манфаатлари йўлида ишлатиб юборгани аниқланган.

Ҳолат юзасидан Жиноят кодексининг 167-моддаси («Ўзлаштириш ёки растрата йўли билан талон-торож қилиш») билан жиноят иши қўзғатилган.