Сурхондарё вилоятида қайтадан ташкил этилган Бандихон туманида Халқ депутатлари туман Кенгашининг навбатдан ташқари биринчи сессияси бўлиб ўтди. Бу ҳақда Сурхондарё вилояти ҳокимлиги хабар берди.
Мавзуга доир: Сурхондарёда Бандихон тумани ҳокимлиги ташкил этилди
Қайд этилишича, Шавкат Мирзиёев 2019 йил 17—18 октябрь кунлари вилоятга ташрифи чоғида Бандихон туманини қайта ташкил этиб, ҳудудни янада ривожлантириш юзасидан тегишли топшириқлар берган. Шунга мувофиқ, Олий Мажлис Сенатининг қарори қабул қилиниб, қайта тикланаётган туманнинг ҳудуди белгиланган. Бу масала Қизириқ, Бойсун ва Қумқўрғон туманлари аҳолиси, халқ депутатлари туманлар ва вилоят кенгашлари сессияларида атрофлича муҳокама қилинган.
Мавзуга доир: Сурхондарё вилоятининг Бандихон тумани қайта ташкил этилади. Қизириқ ва Бойсун туманлари чегаралари ўзгартирилиши мумкин
Сессияда ташкилий масала кўрилди. Қизириқ тумани ҳокимининг биринчи ўринбосари лавозимида ишлаб келаётган Ўткир Чориев Бандихон тумани ҳоким этиб тасдиқланди.
Маълумот учун, Ўткир Чориев 1977 йилнинг 30 мартида Шеробод туманида туғилган. 2001 йилда Тошкент давлат аграр университетини тамомлаган. Маълумоти бўйича мутахассислиги — иқтисодчи.
Фаолияти давомида Шеробод тумани молия бўлими мудири ўринбосари, бўлим мудири, вилоят ҳокимлиги молия бошқармаси бошлиғи ўринбосари, вилоят бўйича Ғазначилик бошқармаси бошлиғи, Қизириқ тумани ҳокимининг иқтисодиёт ва тадбиркорлик масалалари бўйича биринчи ўринбосари лавозимларида ишлаган.
Шунингдек, сессияда туман прокурори, ички ишлар бўлими ва давлат солиқ инспекцияси бошлиқлари, туман ҳокими ўринбосарлари тайинланди.
Ўзбекистон Республикаси бош прокурорининг буйруғига асосан, Анвар Худоёров Бандихон тумани прокурори этиб тайинланди.
Ўзбекистон Республикаси Ички ишлар вазирининг буйруғига асосан, Акмал Бердиназаров Бандихон тумани Ички ишлар бўлими бошлиғи этиб тайинланди.
Ўзбекистон Республикаси Давлат солиқ қўмитаси раисининг буйруғига асосан, Абдуалим Эшбоев Бандихон тумани Давлат солиқ инспекцияси бошлиғи этиб тайинланди.
Таъкидланишича, давлат раҳбарининг бевосита эътибори билан қайта тикланаётган туманни 2020—2022 йилларда ривожлантириш дастури қабул қилинган. Кейинги 2—3 йил ичида ҳудудда саноат, хизматлар ва сервис инфратузилмаси, қишлоқ хўжалиги соҳаларини ривожлантириш бўйича 130 га яқин лойиҳани амалга ошириш орқали 1200 дан ортиқ янги иш ўрнини яратиш, туман ҳудудидан ўтувчи давлат ва маҳаллий аҳамиятдаги йўлларнинг 85 километр қисмини таъмирлаш, ички автомобиль йўлларининг 50 километр қисмига асфальт ва 309 километр тупроқли йўлларга шағал қоплама ётқизиш, 38,4 километр электр узатиш тармоқларини янгидан тортиш ва реконструкция қилиш, 15 дона трансформатор пунктини ўрнатиш, 91 километр ичимлик суви тармоқлари, 11 дона сув қудуғини қуриш ва таъмирлаш сингари кўплаб тадбирларни амалга ошириш режалаштирилган.
Изоҳ (0)