14 февраль, жума куни, ТИВ томонидан ОАВ вакиллари учун матбуот анжумани ташкил этилди. Унда ташқи ишлар вазирининг биринчи ўринбосари Илҳом Неъматов журналистларни қизиқтирган саволларга жавоб қайтарди, дея хабар бермоқда «Дарё» мухбири Миролим Исажонов.
Очиқ мулоқотда ТИВ расмийси Риштон—Сўх йўлининг очилганидан икки кун ўтгач ёпиб қўйилгани ҳақидаги саволга шундай жавоб берди.
«Бунда ҳеч қандай бир сиёсий маъно ва сиёсий омил йўқ. Ҳамма нарса бир-бирига боғлиқ. Қирғизистон — Евросиё иқтисодий иттифоқига (ЕОИИ) аъзо давлат. Евросиё иқтисодий иттифоқи — иқтисодий ташкилот. Бунда иқтисодий режим умуман бошқача.
Шахсан ўзим Сўх йўли очилишига борганман. Тўғри, Сўх йўли очилди ва эртасига ёпилди. Ёпилганининг сабаби — биз ЕОИИ ташкилотга аъзо эмасмиз. Бизда савдо режими мутлақо бошқача. Қирғизистон билан бугунги кунда 21 та пост бўладиган бўлса, 14 та пост ишлаб турибди. Лекин қолган 7 таси, масалан, Сўх ишламаяпти. Ҳозирги кунда бу муаммони ҳал қилиш учун Қирғизистон томони билан музокаралар олиб боряпмиз», — деди Неъматов.
Мавзуга доир:
«Ҳозирги кунда биздан берилган таклифни Қирғизистон томони кўриб чиқяпти. Босқичма-босқич ҳамма постларни очишга таклиф берганмиз.
Тожикистон билан 17 та постни очиб қўйдик. Ўн саккизинчи постни очиш бўйича иш олиб боряпмиз. Қирғизистон билан ҳам худди шундай бўлади. Лекин бунга озгина вақт керак. Чунки Қирғизистон ЕОИИ аъзо бўлганлиги учун уларда савдо режими сал бошқачароқ. Биз бунга сал мослашишимиз керак. Сабаби божхона орқали импорт ва экспорт қилиш, ҳужжатларни расмийлаштириш масаласи ётибди. Аммо бу доимо кун тартибида турибди. Биз буни охирига етказамиз», — деган Илҳом Неъматов.
Изоҳ (0)