Ўзбекистон Олий суди «Озодлик» радиосининг Telegram каналида эълон қилинган «Уч жоннинг ўлимига сабаб бўлган шифокор ахлоқ тузатиш жазоси билан қутулди» сарлавҳали хабарига муносабат билдирди.
Олий суд томонидан маълум қилинишича, Жиноят ишлари бўйича Нарпай туман судининг иш юритуви Азиз Холмуродовга оид жиноят иши 2019 йил 8 ноябрь куни келиб тушган бўлиб, жиноят ишини суд мажлисида кўриш тўғрисида 2019 йил 13 ноябрь куни қарор чиқарилган. Ишни кўриш 2019 йил 19 ноябрь куни бошланган.
Қайд этилишича, 2020 йил 16 январь куни иш бўйича суд қарори чиқарилган. Бунда жабрланувчи М. Нормуродовга етказилган моддий ва маънавий зарарлар тўлиқ бартараф қилинганлиги ва унинг судланувчига енгиллик беришни сўраб, ариза тақдим қилганлиги ҳамда судланувчининг айбига иқрор ва қилмишидан чин кўнгилдан пушаймонлиги, муқаддам судланмаганлиги, оилада ягона ёлғиз боқувчи эканлиги ва жазони енгиллаштирувчи бошқа ҳолатлари инобатга олинган.
Маълум қилинишича, Азиз Холмуродов Ўзбекистон Республикаси Жиноят кодексининг 116-моддаси (касб юзасидан ўз вазифаларини лозим даражада бажармаслик) 3-қисми билан айбдор деб топилиб, Жиноят кодексининг 45-моддаси (муайян ҳуқуқдан маҳрум қилиш) қўлланиб, 1 йилга тиббиёт муассасаларида акушер-гинеколог шифокори лавозимида ишлаш ҳуқуқидан маҳрум қилинган. Шунингдек, Жиноят кодексининг 57-моддаси (енгилроқ жазо тайинлаш) татбиқ қилиниб, ҳар ойда иш ҳақининг 20 фоизи миқдорида давлат фойдасига ундириш шарти билан 2 йил муддатга ахлоқ тузатиш ишлари жазоси тайинланган.
Суднинг ушбу ҳукми юзасидан шу кунга қадар шикоят ёки протест берилмаган.
Изоҳ (0)