Орол денгизи қуриши оқибатларини бартараф этиш ҳамда сайёҳлар сонини кўпайтиришга қаратилган My garden in the Aral Sea («Оролдаги боғим») агро ва экотуризм лойиҳаси амалга оширилади. Бу Президентнинг «Ўзбекистон Республикаси Президенти ҳузуридаги Оролбўйи халқаро инновация марказининг фаолияти самарадорлигини оширишга доир қўшимча чора-тадбирлар тўғрисида»ги қарорида қайд этилган, деб хабар бермоқда Адлия вазирлиги.
Қарорга кўра, Халқаро инновация марказининг эҳтиёжларидан келиб чиқиб, кўргазмали тажриба-синов майдонларини ташкил этиш мақсадида Қорақалпоғистон ҳудудидаги захира ер майдонлари, Орол денгизининг қуриган тубидаги ҳудуддан ҳамда Оролбўйи ҳудудидаги ўрмон фонди ерларидан ер майдонлари ажратилади.
Шунингдек, Нукус шаҳри Марказий бозоридан Нукус туманидаги Халқаро инновация маркази ҳудудигача бўлган йўналишда мунтазам жамоат транспорти қатнови йўлга қўйилади.
Халқаро инновация маркази томонидан «Мўйноқ» ва «Саманбай» тажриба-синов майдонлари ташкил этилган, шунингдек, шўрланиш ва қурғоқчиликка чидамли чўл ва манзарали ўсимликлар генофонди шакллантирилиб, 13 турдаги ўсимлик дунёси объектлари синовдан ўтказилмоқда.
Изоҳ (0)