O‘zbekiston Oliy sudi “Ozodlik” radiosining Telegram kanalida e’lon qilingan “Uch jonning o‘limiga sabab bo‘lgan shifokor axloq tuzatish jazosi bilan qutuldi” sarlavhali xabariga munosabat bildirdi.
Oliy sud tomonidan ma’lum qilinishicha, Jinoyat ishlari bo‘yicha Narpay tuman sudining ish yurituvi Aziz Xolmurodovga oid jinoyat ishi 2019-yil 8-noyabr kuni kelib tushgan bo‘lib, jinoyat ishini sud majlisida ko‘rish to‘g‘risida 2019-yil 13-noyabr kuni qaror chiqarilgan. Ishni ko‘rish 2019-yil 19-noyabr kuni boshlangan.
Qayd etilishicha, 2020-yil 16-yanvar kuni ish bo‘yicha sud qarori chiqarilgan. Bunda jabrlanuvchi M. Normurodovga yetkazilgan moddiy va ma’naviy zararlar to‘liq bartaraf qilinganligi va uning sudlanuvchiga yengillik berishni so‘rab, ariza taqdim qilganligi hamda sudlanuvchining aybiga iqror va qilmishidan chin ko‘ngildan pushaymonligi, muqaddam sudlanmaganligi, oilada yagona yolg‘iz boquvchi ekanligi va jazoni yengillashtiruvchi boshqa holatlari inobatga olingan.
Ma’lum qilinishicha, Aziz Xolmurodov O‘zbekiston Respublikasi Jinoyat kodeksining 116-moddasi (kasb yuzasidan o‘z vazifalarini lozim darajada bajarmaslik) 3-qismi bilan aybdor deb topilib, Jinoyat kodeksining 45-moddasi (muayyan huquqdan mahrum qilish) qo‘llanib, 1 yilga tibbiyot muassasalarida akusher-ginekolog shifokori lavozimida ishlash huquqidan mahrum qilingan. Shuningdek, Jinoyat kodeksining 57-moddasi (yengilroq jazo tayinlash) tatbiq qilinib, har oyda ish haqining 20 foizi miqdorida davlat foydasiga undirish sharti bilan 2 yil muddatga axloq tuzatish ishlari jazosi tayinlangan.
Sudning ushbu hukmi yuzasidan shu kunga qadar shikoyat yoki protest berilmagan.
Izoh (0)