Хитойда коронавирус оқибатида вафот этганлар сони минг кишидан ошиб кетди. Бу ҳақда Хитой соғлиқни сақлаш миллий комиссияси хабар берди.
Маълумотларга кўра, айни вақтда мамлакат ҳудудида 42 638 кишида касаллик ҳолати қайд этилган. 37 726 киши ҳозирда даволанишда бўлиб, уларнинг 7333 нафарининг аҳволи оғир. Жами 3996 киши касалликдан даволаниб, тиббиёт муассасасидан жавоб бериб юборилган; вафот этганлар сони 1016 кишини ташкил этмоқда.
Ўтган бир куннинг ўзида Хитойда коронавирусдан 108 киши вафот этган (103 та ҳолат Хубэй провинциясида қайд этилган). Шунингдек, яна 2478 кишида вирус аниқланган, текширувдан ўтган 26 724 кишининг организмида вирус аломатлари топилмаган.
Эслатиб ўтамиз, Хитой ҳукумати 2019 йил 31 декабрда Жаҳон соғлиқни сақлаш ташкилотига Хубэй вилоятининг Ухань шаҳрида номаълум вирус тарқалганини хабар қилган. Кейинчалик мутахассислар томонидан касаллик тарқатувчисининг 2019-nCoV коронавируси эканлигини маълум қилганди. Жаҳон соғлиқни сақлаш ташкилоти (ЖССТ) бош директори Тедрос Адан Гебрейесус коронавирусга қарши курашда ниқоблардан оқилона фойдаланишга чақирди. Ташкилот ҳимоя воситаларига талаб 100 баравар, унинг нархи эса 20 баравар ошишини тахмин қилмоқда.
Мавзуга доир:
Изоҳ (0)