Бугунги кунда Россияда 20 минг нафар одам ҳали ҳам коронавирус юқтириб олганлик гумони билан мутахассислар назоратида бўлиб турибди. Бу ҳақда «Роспотребнадзор» раҳбари Анна Попова маълум қилган, дея ёзмоқда «РБК».
Попованинг сўзларига кўра, назоратдагиларнинг 6 минг нафари Хитой халқ республикаси фуқароси.
«2019 йил 31 декабрдан бери 769 нафар одам текширувдан ўтказилган ва шифохонага ётқизилган. Шундан 97 нафарида грипп, яна 121 нафар одамда респиратор касалликлар кузатилган», – дея вазиятга изоҳ берган Попова.
Хитойдан келган одамларнинг ҳаммаси карантин ҳудудларига жойлаштирилмоқда ва у ерда икки ҳафта давомида тиббиёт ходимлари назорати остида ушлаб турилибди. Бу каби карантин ҳудудлари Россиянинг давлат бош санитар шифокорининг фармойиши асосида ташкил қилинмоқда. Шунингдек, ҳудудларда Хитойдан қайтган россияликлар учун ҳам яшаш жойида изоляцияланган, мунтазам тиббий текшириш ўтказиш мумкин бўлган махсус зоналар ташкиллаштириш тавсия этилган.
Попова ҳозирча Россия ҳудудида коронавирус инексиясининг тарқалиб кетишини олдини олишга қаратилган чекловлар қўллашга зарурат йўқлигини билдирган. Попованинг сўзларига кўра, касалликнинг ўсиш суръати пасаймоқда, лекин россиялик ва хитойлик мутахассислар ушбу вазиятга баҳо беришга шошилмаяпти.
«Ҳозирча биз ҳам улар ҳам бу борада юқори оптимизмни ҳис қилмаяпмиз», — деган ташкилот раҳбари.
Аввал Россиядаги икки нафар Хитой фуқаросида янги турдаги вирусга чалинганлик аломатлари қайд этилгани маълум бўлган ва уларни мамлакатдан тез орада чиқариб юбориш ишлари олиб борилиши айтилганди. Бу иш амалга ошса, Россия ҳудудида янги коронавирус инфекциясига чалинган бирорта ҳам одам қолмайди.
Ҳозирча Россиядаги карантин ҳудудларида Хитойдан эвакуация қилинган МДҲ давлатларининг фуқаролари ва россияликлар сақланмоқда. Дастлабки лаборатория текширувлари натижасида уларда 2019-nCoV вирусига чалинганлик аломатлари кузатилмаган.
Изоҳ (0)