Ўзбекистон Марказий банки корхона ва ташкилотлар маҳсулотларига ташқи бозорлардаги талаб ва нарх бўйича маълумотларнинг етарли эмаслиги ҳамда экспорт қилиш билан боғлиқ жараёнларнинг мураккаблиги каби омилларнинг салбий таъсири ортиб бораётганлигини маълум қилди.
Марказий банк шарҳида айтилишича, 2019 йилнинг тўртинчи чораги якуни бўйича реал сектор корхоналари билан ўтказилган сўров натижалари мазкур чорак мобайнида мамлакатда иқтисодий фаоллик даражасининг юқори даражада сақланиб турганлигини кўрсатмоқда.
2019 йилнинг тўртинчи чораги якуни бўйича, сўровда қатнашган корхоналарнинг 64 фоизи (2019 йилнинг учинчи чорагида 65 фоиз) ишлаб чиқариш ҳажмларининг реал ҳисобда ошганлигини маълум қилган.
Шунингдек, сўров доирасида маҳсулот ишлаб чиқариш ҳажмининг ошишига тўсқинлик қилаётган омиллар ўрганилган бўлиб, бундай омиллар сифатида хом ашё материаллари (34 фоиз) ва энергия манбалари (27 фоиз) нархлари баландлигини ҳамда солиқ юкининг юқорилиги ва солиқ маъмуриятчилигининг мураккаблигини (21 фоиз) қайд этган корхоналар улуши юқори даражада сақланиб қолмоқда.
2019 йил тўртинчи чорагида экспорт ҳажми ўзгариши индексининг учинчи чорак даражасида (71) шаклланганлиги сўнгги чоракда ҳам экспорт ҳажмлари ошишининг юқори тенденцияси сақланиб қолганлигини кўрсатмоқда.
Бунда экспорт фаолияти билан шуғулланувчи корхоналарнинг 55 фоизида экспорт ҳажми ошган бўлса, экспорт ҳажмининг камайганлигини маълум қилган респондентлар улуши учинчи чоракдаги 18 фоиздан 14 фоизгача қисқарган.
Экспорт ҳажмининг ўсишига тўсқинлик қилаётган омиллар ўрганилганда, корхона ва ташкилотлар маҳсулотларига ташқи бозорлардаги талаб ва нарх бўйича маълумотларнинг етарли эмаслиги ҳамда экспорт қилиш билан боғлиқ жараёнларнинг мураккаблиги каби омилларнинг салбий таъсири ортиб бораётганлиги маълум бўлди.
2019 йилнинг тўртинчи чорагида иқтисодиёт реал секторида мавжуд ишлаб чиқариш қувватларидан фойдаланиш даражаси умуман олганда учинчи чорак даражасида сақланиб қолган бўлиб, фойдаланиш даражаси 70 фоиздан юқори бўлган корхона ва ташкилотлар улуши 64 фоизни ташкил қилган.
Бунда мавжуд ишлаб чиқариш қувватларидан тўлиқ фойдаланмасликнинг асосий омиллари сифатида ишлаб чиқарилаётган маҳсулотларга талабнинг пастлигини қайд этган респондентлар улуши учинчи чоракдаги 18 фоиздан тўртинчи чоракда 23 фоизгача, электр энергияси ва табиий газ таъминоти билан боғлиқ муаммоларни маълум қилган респондентлар улуши 19 фоиздан 22 фоизгача кўпайган.
Изоҳ (0)